Lo 6 de novembre 2023 sortèt ω (Omèga), lo promier EP (Extended Play, format musicau mai cortet qu’un album) de CODEX ANIMA, lo nom qu’esconde Mariana Ajac, dejà conoissuda au nòste per sei reviradas de Safo en occitan, per l’escritura e la comunicacion e Marsouin des Sables que s’encarga de la produccion musicala e tecnica. Aquest EP es un simbòle de musica electronica dei bònas que multiplica leis influéncias e que parte de la mitologia grèga per contar emb una bèla vòtz (en francés pasmens – avèm totei de decas…) de problematicas fòrça actualas.

Aquelei doas dimensions, originalitat tecnica e poesia dedicada a de tèmas importants, son lo còr de la genèsi dau projècte, coma va dién lei personas que ne’n son a l’origina :

Marsouin : « Aqueu projècte èra lo mejan per ieu d’experimentar dins la produccion electronica d’un biais libre mai pron definit en tèrme de direccion artistica per faire quauquaren de coerent. L’aspècte poesia parlada en francés m’agradèt tot d’una, bòrd que sortissiá totalament deis elements qu’aviáu costuma de trabalhar, e assegurava quauquaren d’atipic e doncas originau dins l’identitat dau projècte. »

Mariana : « CODEX ANIMA arriba per ieu dins un moment de ma vida qu’aviáu enveja de contar de cavas, de lei sortir per leis esconjurar. Aguèri sempre enveja de faire de musica, n’escoti fòrça mai siáu pas una musiciana, alora lo rescòntre ‘mbé Marsouin es estat una pilha. Voliáu parlar de tèmas que son […] personaus e universaus, ligats a la santat mentala e a d’experiéncias de vida coma lo dòu (Eurydice) o lei violéncias sexistas (Eris). »

D’aqueste vam promier, anèron puei vèrs lei mites grècs que tènon una importància particulara per Mariana qu’escriguèt lei paraulas : « Aimèri totjorn lei mitologias, despuei tota pichona. M’agradan mai que mai lei figuras femeninas dins lei mitologias, me bastissèri en m’i interessant. » Ditz tanben coma la figura de Fèdra, qu’es sota lo títol Phèdre – Le Destin, la tresenca cançon de l’EP, es importanta per ela : « Siáu enfachinada per son istòria, tocada per lo biais qu’es descricha, la malediccion que n’es victima. Marsouin tanben aimava aqueste tèma doncas avèm pas trantalhat avans de nos metre d’acòrd ! »

Emai s’èran soncament dos a la debuta, se durbèron puei a d’autrei personas e grops per crear aquesta belòia qu’es CODEX ANIMA. Coma va ditz Marsouin, trabalhèron cotria « embé Paul Rungette, creator multimèdia independent, que fèt nòstei clips e visualizadors. » Comencèron tanben una collaboracion embé Le Cargö, scèna de musicas actualas de Caen, per fin bessai de l’i jogar en live, e un single exclusiu en collaboracion embé lo grop de darkwave D·E·M deuriá tanben paréisser dins l’annada.

Fin finala, CODEX ANIMA fa partida d’aquelei projèctes tant passionaus coma professionaus que fan tant de ben au monde de la musica e que podretz retrobar per lo saborar sus Youtube, Soundcloud, Bandcamp o tanben Spotify.