Doctor Who, podèr e responsabilitats
Doctor Who z-es una seguida de television britanica de sciéncia-ficcion qu’exista dempuei las annadas seissantas. Quo es una institucion per la cultura britanica e tot le monde de l’isla z-o coneissa, au mens de nom e au mens quauques personatges, coma los Daleks, le Maistre, e evidentament, le Doctor.
En 2023 l’emission aurá setanta ‘nadas, e en tant de temps i aguèt un molon de concèptes de sciéncia-ficcion, de biais d’escriure, d’idèias, que fuguèton testats, pr’amor que l’escritura de la seguida z-es franc liura e l’òbra de tot plen de personas, de totas las epòcas, genres, originas (a l’imatge daus personatges de la seguida).
Mas me’n vau pas parlar de tota la diversitat de la seguida, me’n vau parlar de la constanta, daus ponts comuns.
Podèm botar Doctor Who en oposicion dins le monde de la sciéncia-ficcion embei las grandas produccions americanas coma Marvel e Star Wars (enfin Disney). D’un costat avèm una seguida d’Euròpa, per le servici public britanic, embei sovent pas biaucòp de mejans, e de l’autre de las grandas produccions capitalistas americanas. D’un costat la question de la morala z-es sovent abordada, de l’autre quo es sobretot dau divertissament, un parc d’atraccion cinematografic.
Sobretot dins los filmes Marvel, se’n fotèm de la vida dau monde. L’important quo es d’avèr daus eròis que fan de las chausas grandas, que lhur podèr z-es una donada dau ciau (o de l’argent). Lhur podèr z-es pas de bon accès per le monde, son un pauc « d’elegits », e quo se vèsa sobretot quand n-i a daus combats còntra daus meschants, los eròis se’n fòton daus desgasts autorn, le pòble z-es pas poderós, fan mas que contemplar la fatalitat e priar los eròis coma daus dieus.
Dins Doctor Who, le Doctor z-es un Senhor dau Temps coma los autres de basa, (ten pas de podèrs en mai que los de sa mena mèsma si z-es incredible per un uman), ten pas d’armas, e sobretot, z-es pas per considerar que le monde « normaus » son pas importants. Z-es totjorn per veire l’importança dins chasca persona, chasque èsser viu. Son plan z-es de ganhar còntra los meschants, òc-es, mas pas de n’impòrta quun biais, totjorn d’un biais que tot le monde son sauvats, mèsma los antagonistas, per çò que dins sa filosofia, n-i a totjorn dau bon dins chasca persona. Z-es jusca per se sacrifiar per quauqu’un que sembla mens important qu’ilh.
De mai, la diplomacia z-es totjorn preferida a la fòrça bruta. Quand un eròi Marvel z-es embei l’armada, le Doctor li agrada mai la pensada pacifista.
Per iu, Doctor Who z-es una òda a la vida (e quo se vèsa notadament embei le concèpte de regeneracion), e sobretot a la pacifitat, la diplomacia, la non-violéncia. Las doas istòrias que representan le mai quo son los dobles episòdes Hungry Earth/Cold Blood (en francés La Révolte des intra-terrestres) e The Zygon Invasion/The Zygon Inversion (Vérité ou Conséquences) que vos conselhe d’espiar.
« Quand tiratz le promèir còp de fuòc, dreit que dreit que vos sentatz, anètz pas jamai saupre quau vai morir. »
Le Doctor, The Zygon Inversion.