Anne-Pierre Darrées
Anne-Pierre
Darrées
Anne-Pierre Darrées, arquitècta culturala en çò de l’Escòla Gaston Febus, a bravament obrat a la sortida de Paraulas de Hemnas. Un trabalh de coordinacion e de correccion indispensable a la fabricacion d’una tala òbra. Venguèt tanben en 2020 una de las plumas del present jornal, ambe sa cronica scientifica. Dobla escasença e dobla rason de la vos presentar !
– 1 –
Nos podètz dire la motivacion e la natura de la vòstra participacion al recuèlh Paraulas de Hemnas ?
Lo projècte de Paulina Kamakina que m’a interessada pr’amor permetèva d’explorar duas questions : la plaça de la hemna dens la literatura d’òc e l’escritura feminina. Suu prumèr punt, qu’èi cercat quantes libes estón escriuts per hemnas dens l’istòria. Mens de 3% per tota la França dinc a la meitat deu sègle XIXau. Qu’estó péger dens la literatura d’òc. De segur, qu’avem trobairitz, mès après ? A l’epòca barròca, en Gasconha per exemple, sègles de reneishença de la nosta poesia, n’èi pas trobat arren. Nat nom d’autora ! Adara que son numerosas mès enqüèra pòc editadas. La segonda question qu’èra : existish ua escritura feminina ? De segur que perpausan tèmas e escrituras de tota mena, totun que i a especificitats. Per exemple, las hemnas que parlan de la hemna, deus pairs, deus mainats.. dab doçor, dab malícia, dab pregondor, dab fantasia… Qu’èi coordinat lo trabalh d’editor, qu’ei a díser los cinc correctors de las Edicions Reclams, la relacion editoriau dab Paulina e las autoras, qu’èi corregit las reviradas en francés e supervisat la fabricacion deu libe. Un trabalh de tres mes pontuat deu plaser de las descobèrtas.
– 2 –
Nos podètz contar vòstre engatjament ambe l’Escòla Gaston Febus ?
Qu’èi coneishut l’Escòla Gaston Febus en tot cercar documents sus Fernan Sarran. Qu’escrivi ua biografia d’aqueth campion de la lenga e que trobèi sus internet lo libièr de l’Escòla situat au castèth de Mauvesin dens las Hautas PirenèasQue'vs conselham, entà anar mei luenh, la lectura deu Diari n°53, dedicat justament a l'Escòla Gaston Febus.. Que i èran los libes deishats peus sòcis de l’Escòla pendent 120 ans. Qu’èran sonque inventoriats. Alavetz, qu’èi perpausat de me n’aucupar, numerizar los libes liures de dret, escríver e publicar notícias bibliograficas, referenciar e estruçar los documents, etc. Globaument, que i a un gran riquèr dens las produccions d’òc mès la difusion que’m sembla insufisenta. Donc qu’avem aviat un programa de publicacion numerica : un blòg de cultura regionau en francés (escolagastonfebus.com), un site tà mainats (arraton.fr) e, adara, en desvolopament, un site d’actualitats entà gojat·a·s (ActuJoens). Que foncionan mès pensi que seré melhor dab un hialat organizat deus actors deu patrimòni immateriau en òc. Ua crida a las bonas volontats !
– 3 –
Sètz uèi una de las plumas que fan Lo Diari, nos podètz presentar vòstre « Cornèr de las sciencias » ?
Aquò que m’impòrta hèra, pr’amor qu’èi ua formacion scientifica. Entà jo, la lenga qu’ei un mejan de comunicacion, lo de la nosta identitat. Que servish a parlar deus subjèctes de uei. De literatura de segur, e tanben d’actualitat, de BD, d’istòria, d’ecologia, d’industria, d’agricultura, en dus mots de tot. Donc, quan Lo Diari hasó ua crida tà trobar redactors d’articles, que’m semblè naturau de perpausar aquera cronica. Los tèmas que son centrats sustot sus las sciéncias formaus. Que parli o que vau parlar de matematica, de numeric, de robotica, d’espaci, de fisica quantica… Se los legidors vòlen quaucom d’especiau, que serí urosa de respóner… s’ei de la mia competénciaEscríver a la redaccion, qui harà seguir !.
