Seleccionar una pagina

Tòca-Maneta

0 |

Vièlhas mascòtas e eròis novèls

Aloy – Horizon Zero Dawn
Lo teton de la discòrdia
© 2017 Freepik.com

Chaspaires de maneta, picanhaires de botons, balhaires de jòia a stick e esportius de canapè, adiussiatz !

Vos vau far una confidéncia, que risca de ne susprene qualques uns : Mario m’agrada pas. Atencion, parli pas aquí dels jòcs Mario, que son estrechament ligats, per lor qualitat tecnica, a l’industria videloudica dins son ensemble, fins a ne venir l’imatge lo mai conegut dins lo monde. Non, vòli dire Mario en tant que personatge, en tant que eròi. Dempuèi trenta ans son enjòc es lo meteis : anar desliurar sa princessa ben-aimada, sens que foguèssem segurs qu’aquesta benaimança es plan recipròca.

Après es un pauc de ma fauta a ieu, que jògui mai que mai per d’univèrs, de scenarii, de personatges folhats, amb una istòria pròpia, d’enjòcs personals de complir en parallèl de salvar lo monde. Parlatz-me de Geralt de Riv (The Witcher), d’Ezio Auditore (Assassin’s Creed), de Niko Bellic (GTA IV), de Joel o Ellie (The Last of Us), aquí òc, son de personatges principals umans, amb de feblesas, qu’evoluisson en mesma temps que nosautres jogaires. Parlatz-me quitament de Shepard, que seguissèm del primièr al darrièr numèro de la seria Mass Effect, çò que nos buta a nos i estacar, quitament s’es nosautres que l’avèm creat, que li avèm donat sos traches, que li avèm definit son comportament… La magia del videojòc.

Mas es que lo eròi, en tant que eròi, es relativament recent dins lo mèdia, e apareguèt segurament al moment que lo videojòc se botèt d’engolir lo cinèma, la literatura, e d’autres mèdias. Abans aquò, los eròis èran pas que de mascòtas. Òc-ben, Super Mario èra la mascòta de Nintendo, son eraud, son pòrtabandièra, coma Sonic per Sega, puèi plan d’autres : Kirby, Crash Bandicoot, Alex Kidd, o encara Pikachu. Lor ròtle èra plan diferent, al moment qu’apareguèron, d’aquel d’un personatge de film, d’exemple : èra un argument « publicitari », colorat, simpatic, cartoonesc, e forçadament un pauc superficial. Una pelucha virtuala. E fin finala en granda majoritat aquelas mascòtas intemporalas, an vielhit, amb lo public qu’avián capitat de far entrar dins lor monde. E aquel public, en aprofiechant de las evolucions tecnicas, n’a volgut mai, mai de realisme, es aquí qu’apareguèron de caras mai umanas, e, en partissent d’aquò, lors falhas, lors istòrias, lor umanitat…

Puèi n’i a quitament qu’an fach de progrèsses : quand vesèm lo personatge d’Aloy, dins lo recent Horizon Zero Dawn, una femna, liura, fòrta, independenta, pas brica representada coma un objècte de fantasma (una anti Lara Croft en soma), amb sa quista personala, intima, familiala, ligada a una epopèa mai globala, aquò es un referent cultural que farà data, al qual de millions de jogaires e jogairas se podrán restacar, per plan d’annadas encara.

D’aquel temps, la vièlha mascòtas començan de rejónher e crosar lo camin dels novèls eròis, e de nosautres : Mario es sortit del Reiaume Campairòl per se passejar a Nòva York, Sonic es a mand de sortir un filme, Pikachu s’es botat de parlar, e repàpia pas pus son nom per mostrar sas emocions…

Mas i a encara de camin de far, e l’umanizacion de nòstras vièlhas peluchas es pas tant simpla. Avètz que de véser l’èrsa levada a l’aparicion, dins la banda anóncia de Super Mario Odyssey, d’un Mario en vestit de banh e… teton vesedor ! Mais se las reaccions foguèron mai de suspresa mesclada de segon gra que d’intolerància, sembla qu’aquò siá totjorn un pauc riscat de representar d’unas icònas !

A prepaus de l'autor

Tristan Gahús

Tristan Gahús es l'escais, coma aquò se fa dins aquel mitan, de qualqu'un qu'aima plan los videojòcs e qu'es prèste a partatjar sa passion en occitan. Autor de detzenas de cronicas, de còps radiofonicas, sus las sortidas recentas, chafradas Tòca-Maneta, tòrna sul Diari amb una novèla formula, mai larga e mai "trans-mèdia", coma se ditz en occitan blós !

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !