Un doble agach suls Contes del Drac

Los contes del Drac es una òbra escrita per Joan Bodon, legida e fòrça presada per un public larg e de totas originas (locutors occitans o non). Foguèt una òbra inspiranta per un fum de mond, mas sustot instructiva. A cada fin de conte, amb l’oposicion dels umans al personatge del Drac (filh del diable), aprenèm una morala que nos balha una leiçon sus la vida quotidiana.

Aqueles contes coneguèron de nombrosas readaptacions, e notadament una, qu’es la benda dessenhada de l’escòla Joan Bodon de La Primauba, editada en 2009. Tòrna prene aquestes contes amb l’agach dels enfants. Los dessenhs foguèron faches pels escolans e l’escritura, ela, foguèt readaptada per pegar al format de la benda dessenhada, çò que permet de comprene l’istòria rapidament. Cal saber qu’aquesta benda dessenhada foguèt escricha dins las doas lengas (francés e occitan) ja que l’escòla primària es bilingüa e doncas mescla las doas culturas. Lo projècte foguèt iniciat per la mediatèca de La Primauba en 2008 dins l’encastre de la Prima Occitana e coma prenguèt d’amplor, l’escòla decidiguèt de ne fargar una BD. S’ai fach la causida de vos ne parlar aquí, es que foguèri demest los escolans que trabalhèron sus aqueste projècte. Aital, ai l’escasença de transmetre als lectors del Diari un doble punt de vista (quora èri enfant e ara).

Dins un primièr temps me remembri que los escolans èran fòrça contents de participar a aqueste projècte. D’un biais general, lor agradan als enfants los mondes fantastics e del conte puèi que permeton de viatjar dins un autre univèrs. Lo personatge del Drac es fòrça enigmatic e pòt far paur. Ara, los contes servisson mai a illustrar una morala finala e fan de mens en mens intervenir la dimension fantastica. Quora farguèrem aquesta benda dessenhada, decidiguèrem tanben de la far en negre e blanc (a l’interior) per de rasons financièras, mas èrem nosautres que decidissiam çò qu’anàvem representar dins las casas e cossí lo far. Per trabalhar dessús compausèrem de pichons grops de 4 o 5 personas e cadun aviá un pauc son quicòm favorit que podiá èsser un personatge, un animal, un decòr (ieu aviái causit un moton del conte Lo Moton). D’en primièr o caliá tot far al gredon de papièr (traçar las botiòlas, far los primièrs traches…) e aprèp vertadièrament dessenhar. Aviam fòrça libertat sul projècte e quora l’ensenhaire validèt la fin de la benda dessenhada, l’escòla la tirèt a 400 exemplaris e la vendèt als escolans en prioritat. A la fin de l’annada totes recuperèrem la benda dessenhada e aguèrem la satisfaccion de la veire acabada, reala, amb sa cobèrta en colors. En classa foguèt utilizada per trabalhar sul conte mas tanben per far conéisser als enfants un autor important, Joan Bodon, tot en facilitant la lectura de son òbra a travèrs la BD.