Aquelei tèxtes son estats escrichs entre 2014 e 2019, au fieu dei jorns. Constituisson de testimònis, de reaccions a d’eveniments, d’analisis de la lenga ò de pensadas sus de lecturas, l’escritura. Lo lector de uei podrà pensar que son datats, çò verai. Son de tralhs, la marca dau temps que va. Es per aquò que son mantenguts dins sa forma, son estil e son contengut. Lei prepaus d’un panflet son d’evidéncia pastats d’ironia critica ; es la lèi dau genre. D’unei trobaràn benlèu que quauqueis afirmacions pareisson exageradas, mai se pòt pas, sens riscar l’aflaquiment, trebolar un genre per l’aplanir e lo rendre flasc. Aquela ironia critica foguèt sempre companha de grafinhadura que, sota l’arpa, s’i devina la volontat d’anar mai avant dins la pensada e la discutida necita per tota lenga e tota cultura.