Seleccionar una pagina

Espòrt

0 |

Possam totis amb la F.O.R. !

Possam totis amb la F.O.R. !

Le Tornèg ven pas que començar amb las classicas seleccions de Gallas, Inglatèrra, Escòcia, França, Itàlia e Irlanda, mès es qué coneishètz la F.O.R., Federacion Occitana de Rugbi ?

Dempuèi le diluns 11 d’octobre de 2014, la Federacion Occitana de Rugbi (F.O.R.) venguèc una realitat dins le païsatge occitan.

Les estatuts de la F.O.R precisan qu’es « una entrepresa umanista e (que) se reconeish dins las valors de l’Educacion Populara. Atal, lo nòstre projècte esportiu carreja valors de solidaritat, d’entrajuda e d’egalitat entre los individuas e los pòbles, claus pour luitar amb eficacitat contra totas fòrmas de discriminacions e favorisar atal, l’escota de siu meteish e de l’autre, la presa de responsabilitat, la vida de grope e la libertat de causir ».

Atal, la Federacion Occitana de Rugbi se da mejans per sensibilisar tota mena de public sus la practica d’un rugbi educatiu amb per tòca de crear tornègs, campionats e seleccions. Aquí, la referéncia a las valors de l’Educacion Populara es una posicion de principi per afirmar que la nòstra joinessa occitana se pòt acomplir per l’espòrt. Volontat tanben d’afirmar que coma occitan, participam e participarem a l’amistat e la solidaritat entre les pòbles e que le rugbi ne serà un polit supòrt.

L’utilizacion de la lenga occitana coma lenga usuala de la Federacion es estada gravada dins les estatuts per fin d’agir amb eficacitat per la socializacion e valorizar al milhor la cultura nòstra alprèp dels/de las diferent-a-s prticipant-a-s e del public. Le corpus de las règlas internacionalas es estat revirat per enquadrar partidas e subretot començar de formar al pus viste educators e arbitres.

La F.O.R. es una aisina de valorizacion de la cultura e de la lenga segur mès desbrembam pas que la tòca prumièra es d’obrar sul terrenh esportiu. Gràcias als clubs nombroses presents sul nòstre territòri lengüistic tant amators coma professionals, avèm ja le potencial per èstre competitius e ganhar le respècte. La volontat de la F.O.R. serà d’acompanhar aquesta potença cap a una identitat de jòc per tota sas compausantas. Jogar en libertat e se formar amb educators sensibilizats a un rugbi d’adaptacion, un rugbi intelligent.

Fòrças element nos permeton de créser a la capitada d’aquesta entrepresa : culturalament, le nòstre espòrt es ancrat dins les territòris dempuèi generacions e participa al manten de la vida associativa tan dins les barris coma dins les vilatjòts, e assegura atal un necessari ligam inter-generacional ; esportivament, la lenga e la cultura occitanas son veïculadas per equipas e afogats per cantas (Se canta, Copa Santa, Encantada…) e fins al vocabulari tecnic, emai, fòrça clubs, coma clubs professionals, suportaires, òbran ja per afirmar aqueste eritage ric ; juridicament, fòrças exemples nos permeton de créser a la possibla oficialisacion de la Federacion sul territòri francés e una integracion futura dins las instàncias internacionalas del rugbi tant europencas (Rugby Europe) coma mondialas (World Rugby). Sonque per l’exemple, de las quatre Federacions constitutivas de l’IRB : Irlanda, Inglatèrra, Escòcia e Gallas ; cap son pas consideradas coma Estat-nacion, sèm nosautres tanben tan legitimas coma les autres per participar a aquesta fèsta ; economicament, la F.O.R, per la creacion d’eveniments variats, obrarà per metre en valor e federar les diferents actors del nòstre territòri linguïstic.

Alavetz, pas pus d’esitacions, possam amb la F.O.R, e totes amassa transformam l’ensag !

Per prene contacte amb la Federacion Occitana de Rugbi : federacion.occitana.rugbi@gmail.com

La paja Facebook : www.facebook.com/federacion.occitana.rugbi/

A prepaus de l'autor

M’aboni !

Far un don al Diari

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !