Seleccionar una pagina

3QA

0 |

Occitània Creativa

Occitània Creativa

occitaniacreativa.org

– 1 –

Disètz sus vòstre site internet que sètz una « platafòrma occitana de recèrca-accion en desvolopament territorial ». Concretament que vòl dire aquò ?

Començarem per dire que lo site es tot noveu, e lo project tanben. Exista oficialament dempuei lo 1er d’abriu, quitament si matura dins nòstres esperits dempuei un brave moment. Endonc, vos mercejam de nos balhar, aquí, la paraula.

La nocion de rechercha-accion prend, per nautres, una fòrma principala : un project de rechercha universitària de tresesme cicle s’integra tanleu la desbuta dau project d’Occitània creativa. Quò sira una tesa en geografia umana. Queu trabalh de rechercha sira menat per Alexia Charrier, estudianta a l’Universitat de Pau. L’objecte d’aquela tesa sira d’estudiar coma l’occitan pòt « participar a la mutacion sociala e sociò-economica de nòstres territòris ».

Qu’es a dire que sem dins un periòde de mutacion. Nòstra societat a mestier de se tornar inventar, que nos podem pas satisfar de l’avenidor que nos es, per lo moment, perpausat. Vesem frotjar tot un fum de perpausicions novelas : economia sociala e solidària, economia collaborativa o, mai simplament, de las fòrmas novelas de governança, mai orizontalas, de las organizacions localas, que l’uman, mai una fòrma de resiliénça, ne’n son lo centre, e non pus l’economia.

Partejam la conviccion que l’occitan, tras las valors que pòrta, son istòria, sa cultura, son biais diferent de veire lo monde, pòt portar beaucòp a totas ‘quelas faiçons de veire l’avenidor. La tesa d’Alexia cherchera a botar daus concret, dau tangible, sus çò qu’es per nòstres una (fòrta) intuicion. Mas cherchara d’abòrd a comprener quaus son los ligams entre la lenga, la cultura e lo territòri, e coma lo fach d’aver una melhora conneissança de ‘quelas partidas de se se podem investir dins los domenis que viran a l’entorn de l’idéia de desvelopament territoriau : economia, cultura, torisme, coesion sociala…

Si nos presentem pas unicament coma una estructura de desvelopament de l’occitan, nos situem tot parier dins lo domeni de la socializacion de la lenga. Las responsas que perpausa, per exemple, l’economia sociala e solidaria, son per nautres, de las responsas a la crisa sociala que vivem. Plaçar aquí l’occitan, qu’es lo plaçar dins lo tren per doman. Qu’es lo botar en perspectiva emb lo monde de doman, e entau contribuar a li balhar una chança de mai de subreviure.

Vòstra question concerna tanben le terme de « platafòrma ». Aquí, vos podriam far doas responsas diferentas.

La prumiera siria de dire que nos perpausem de far, tant que possible, lo ligam entre lo monde de la rechercha e lo de l’accion en favor de l’occitan.

La seconda siria de dire que fau ben utilizar daus mots. Uei, tot lo monde se dich « platafòrma », tot lo monde vòu crear de las « dinamicas », far de la « concertacion », « desvelopar » lo territòri, la cultura (cultura?), l’economia. Nos pausem, daus uns còp, tot un fum de questions sus l’emplech e lo poder daus mots. ‘Quilhs mots que druben sus daus concepts diferents segon nòstre niveu de conneissança, nòstra cultura personala o tot simplament nòstra profession. Una de nòstras interrogacions pòrta, d’un biais generau, sus lo rapòrt que pòt existir entre la lenga e lo territòri. Nos demandam quaus podrian estre ‘quilhs mots si eran pensats dins una autre lenga que non pas lo francés. E si las accions qu’entrainen sirian las mesmas.

Segur, quante parlem d’occitan, pensem tanben a las autras lengas regionalas, minoritarias o tot simplement localas, en França, mai sus la planeta. Parlem d’occitan perque vivem en Occitània. Un biais, per nòstres, de pensar globau e agir locau.

– 2 –

Quines son los objectius d’aquela estructura e quines son los mejans meses en plaça per los tocar ?

Los objectius ? N’i a tot plen. Lo prumier es de trobar lo(s) biais de rendre lo project economicament viable. Avem mestier de poder viure de l’activitat de l’estructura per contunhar de persegre nòstra tòca. Per quò-qui, sem a desfinir una ofèrta de servicis, que ne’n podetz prener conneissança sus nòstre site internet. Mas un còp de mai, lo project es dins sas prumieras setmanas d’existénça, e ‘quela ofèrta devria evoluar dins lo temps. Per lo moment, perpausem daus servicis que repausan sus las competencias prumieras daus tres membres de nòstra còla : engenheria de project, estuda e analisa territoriala e realizacion audiovisuala.

Un de nòstres objectius principaus es tanben lo de nos integrar armoniosament dins lo malhum associatiu e professionau occitan, en Perigòrd (que sem de Perigòrd), mai en Occitània e, perque pas, en delai, que la question de l’integracion de la cultura locala dins las problematicas de desvelopament concernen pas unicament Occitània.

Enquera mai globalament, volem montrar que l’occitan, las lengas regionalas e tot çò que tòca una compreneson mai fina de las problematicas localas, mai de l’accion locala son de las responsas a d-una crisa globala. Volem montrar tanben qu’una persona, un jòune per exemple, qu’es sensibilizada a la pratica de sa cultura mai de sa lenga sira una persona que se podra considerar autrament, e aura d’autras armas per se posicionar coma un actor locau, dins una consciença globala dau monde. Fin finala, podriam presque dire que l’ADN dau project se tròba dins ‘quela idéia simpla. Mas per conservar un pauc d’umilitat, ajoutarem que sabem plan qu’inventem ren, e que ‘quela mena de vision es plan correnta dins lo malhum occitan.

En çò que concerna los mejans, siran uros de trobar de l’ajuda tras las collectivitats, quitament si pensem viure principalament de nòstra activitat, çò que supausa de bastir un modele economic viable. Qu’es justament lo trabalh que sem a menar, per aura, dins l’encastre d’un Dispositiu locau d’acompanhament (DLA). Es realizat per l’Agença Sirventés, que fai un pauc, per nautres, chara de grand frair, en estre la pròva qu’um pòt bastir una activitat economica a l’entorn de la lenga e de la cultura occitanas.

– 3 –

Cossí nasquèt l’idèa d’aquel projècte ?

Quò fai un brave moment qu’avem ‘quela idéia !

Avem trabalhat mai de quinze ans a botar en plaça la politica en favor de l’occitan en Perigòrd. D’en prumier dins lo mitan associatiu, au dedins dau Comitat Perigòrd Lenga Occitana (CPLO), qu’era un espaci d’eschange e d’accion qu’amassava lo Bornat e Novelum (Las seccions localas dau Felibritge e de l’IEO), puei dins l’Agença culturala despartamentala Dordonha Perigòrd e lo Conselh despartamentau de Dordonha, onte nòstra accion principala fuguet la construccion de l’eschema despartamentau de desvelomament de la lenga e de la cultura occitanas. ‘Questa partida de nòstra istòria nos mena tanben a contunhar d’aver enveja de situar nòstra accion dins lo domeni de las politicas publicas.

Endonc, totas ‘quelas annadas de trabalh nos balheron l’enveja, d’en prumier, de passar dau costat de tots quilhs actors que, per lors engatjament e lor creativitat, luchan tots los jorns per la lenga, mas tanben d’aver de las possibilitats de reaccion mai grandas que las que podem aver au dedins de l’institucion. De segur, ‘quela chausida implica tanben de las constrentas, tant sus lo plan professionau que personau. Mas nos laisserem tanben guidar per l’idéia que la presa de risca fai partida de las condicions per bastir lo monde de doman. Si vos volian respondre emb d-un pauc d’umor, vos auriam tanben pu dire que la « crisi de la quarantena » es benlèu pas per ren dins tot aquel afar.

Mai seriosament, l’idéia nos venguèt, au fiau de las annadas, en veire totas las possibilitats qu’òfra la transversalitat ligada a las accions que podem menar a l’entorn de l’occitan. Avem passat tot queu temps a dire qu’es possible de desvelopar daus modeles economics que repausan sus l’occitan. Puei un jorn avem pensat que zo dire, qu’es ben, zo far qu’es mielhs.

A prepaus de l'autor

Lo Diari

Aquel compte es bailejat per tota la còla de redaccion del Diari. Es aquel compte que s'ocupa dels afars corrents sus aqueste site e s'encarga de la publicacion dels articles.

M’aboni !

Far un don al Diari

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !