Entre Temps… qu’es aquò ?
Es a se demandar cossí vuèi le teatre, que de mès en occitan, pòsca arribar a se fèr una plaça, tant menudeta siaga, demest les lésers e passatempses pletorics e envaïdors que coneguèm. Vaquí coma exemple l'aventura de la còla de teatre de l'IEO d'Arièja.
Lo principi : demandar a una persona entrevistada dins l’emission de la setmana, o vista dins son encastre, de nos desvelar lo mot occitan qu’aima mièlhs e de dire per de qué. Puèi nos deu dire qual es lo mot qu’aima lo mens e enfin nos liurar son còp de còr e lei rasons de sa causida.
Cada persona entrevistada trasteja pas gaire de temps per trobar lei responsas, e avèm aquí de suspresas saborosas. Totei lei domenis son citats, tant lei sentiments, coma lei trachs de caractèr, lei qualitats o lei travèrs, lei païsatges, lei plantas, la natura, lei bèstias, que te sabi ieu ?
En fach es un bon mejan per legir a travèrs la causida dau mot, la natura prigonda de la persona, sei gosts o seis envejas. Es amai un moment que s’i pòt devinhar lo biais de viure de quauqu’un, sei causidas musicalas o literàrias, e aquò subretot amb lo còp de còr. Òm i pòt sasir l’ample de la creacion culturala occitana : concèrts, libres, pèças de teatre, fotografia, arts plastics. Quanta riquesa meis amics !
Pasmens i a encara quicòm de mai susprenent : la descubèrta de mots rares que tornan sovent montar de l’enfança : « Ma maire me disiá…. peclotar. Per quicòm que marchava pas ben drech ! » E espelís un mot jamai ausit, que tinda coma una musiqueta rara, just per lo plaser de lo tornar entendre. Un mot benlèu sonca familiau e inventat de còps que i a !
Lo ligam sentimentau a la lenga es evident. Quant de còps, l’esmoguda pren lo que filma e culhís aquel mot desconegut ? Fin finala lo pren coma un present que serà ofèrt au telespectator, a la fin de l’emission.
La còla de Tè Vé Òc vos convida a agachar de pròche aqueleis Entre Temps. Benlèu que vos demandaretz a vòstre torn qual es lo mot qu’aimatz mièlhs, lo qu’aimatz lo mens e…vòstre còp de còr. Mancarà pas pus que de vos faire entrevistar quand cubrirem un eveniment en çò vòstre !
Rendètz-vos sus http://teveoc.e-monsite.com/
