Avetz entenut a parlar de l’emission d’ÒCtele Artistas de Noste ? N’at pensi pas, qu’ei tota navèra. Mes justament, dens lo purmèr episòdi, que s’i mesclan art e artisanat. Qu’anèm encontrar a Samuel Méric, un joen qui coneishetz dilhèu peus sons grops de musica com Gofannon o Nedergöth, mes dilhèu tanben peus carnix que harga eth-medish a la bòrda familiau a Aurivalh, au sud de Tolosa. Aqueths carnix que son reconstitucions de sòrtas de granas tutas de guèrra celticas, hèitas de coire e beròi adornadas, qui lo Samuel e hè de l’A dinc au Z a partir de documentacion d’istorians e de modèles arqueologics.

Que poderatz arretrobar au Samuel sus ÒCtele tad apréne’n mei sus la fabricacion deus carnix e suus sons projèctes musicaus.

Artistas de Noste qu’ei donc ua navèra emission dedicada, bahida, aus artistas de totas arts, en la quau volem deishà’us lo temps de parlar mei en detalhs de las lors practicas artisticas, de las lors pensadas, e tot simplament de n’apréner mei sus eths e eras. Tot aquerò qu’èra complicat en reportatges classics de tres minutas, e qu’avem donc volut prepausar aqueste navèth format de 13 minutas tà balhar la paraula aus nostes artistas.
L’emission qu’ei produsida dens l’encastre deus acòrds qui a ÒCtele dab l’OPLO e lo departament deus Pirenèus Atlantics.

Tà cambiar de musica, que poderatz tanben arretrobar un reportatge sus la fabricacion d’acordeons de Maugein, a Tula. Que l’arretroberatz dens la rubrica “Reportatges” en cercar un drin luenh endarrèr a la data deu 5 de julhet de 2018.