Tot çò de publicat per Sauveterre

Marselha, lo Pòrt Vièlh. Junh 2017. Lo rescòntre d’asard d’un òme e d’una frema. Un escrivan qu’ama d’escotar de racòntes, em’una musiciana que n’a un de dire. Aqueu d’una joventa que sa premiera istòria d’amor, mancada, li fa considerar sa vida amorosa venenta d’un biais singular. Leis esperiéncias successivas, que son trajècte au còp sentimentau e musicau li farà conéisser, saupràn pas la faire cambiar de vejaire. Alevat d’una.

Promier, un decòr grandiós, aqueu de Marselha : lo Pòrt Vièlh, la rada, leis isclas. Après, segur l’a una istòria, aquela qu’arriba a Lisa après la messa de Pascas. Lisa, una musiciana, una fremna qu’ama leis òmes e leis arramba librament. Mai aquela vida deliura que mena, serà destorbada per dos rescòntres singulars. Un pessuc de mistèri, tanben, de cauvas pas fòrça catolicas que si passan dins lei dessús d’una glèisa. E una nuech dins l’archipèla dau Frieu, que tot s’i nosa e s’i desnosa.
Lei luecs : lo pòrt de Marselha, leis isclas, una glèisa ambé son orguena, l’apartament de Lisa, lo restaurant, lei cafès, lei carrieras de la vila, lo jorn, la nuech e lo matin.
Lei personatgis principaus : Lisa, Oscar, Pèire, Nicòla, Francés, lo paire Stolz, d’ancians militants esquerristas, una faussa trèva.
L’epòca : bensai la debuta deis annadas dos mila.

Vaicí l’itinerari d’un jovent e d’una joventa, dins lo Marselha deis annadas 1970. Dos èstres deliures, dos personatgis singulars qu’an en comun un secrèt. Aquesto roman avança dins una epòca que lei grands principis moraus chaviran, que lei ròtles de l’òme e de la frema si tròban de definicions novèlas, que l’amor e l’erotisme son mai fòrts que lei lèis matrimonialas. Au grat de rescòntres estonants, Gile e Nina constituïràn a son entorn una tropa d’artistas. Chascun adurrà amb si son talent particular. Après un faus desnosador de drama liric a l’italiana, s’anóncia un finau vertadier d’un genre autre.