Lo roge es una color de luchas, de susmautas, de revolucions ; es pas un azard s’es estat causit coma títol d’aqueste darrièr projècte del famós grop de polifonia femenina La Mal Coiffée. La tencha vermelha ocupa l’espèctre, entre lo lum absolut del solelh d’una alba novèla e lo negre pregond de l’anientament. Engatjat e poetic, lo disc aqueste s’acara a totas las dominacions a l’òbra dins la societat e lo temps nòstres, per de tèxtes d’ièr e de uèi (Claude Alranq, Auguste Fourès, David Grosclaude…) causits e meses en musica per Laurenç Cavalié. Un trabalh plan diferent dels 5 precedents, que ressondís coma una crida de liberacion, ancorada aquí, e ara.