Raconte d’una iniciacion crosada:

Étienne Davodeau es autor de benda dessenhada, sap pas gaire del monde del vin. Richard Leroy es vinhairon, a quitament pas jamai legit de benda dessenhada. Mas aquels d’aquí son totes dos de bona volontat e plan curioses. Perqué se causís de se vodar la vida a escriure e dessenhar libres o a produsir vin ? Cossí e per qual se fa aital ? Mai d’una annada de temps, per respondre a aquelas questions, Étienne anèt trabalhar dins las vinhas e la cava de Richard, que, en retorn, cabussèt dins lo monde de la benda dessenhada. Dubriguèron fòrça botelhas e legiguèron fòrça libres. Se passegèron, anèron rencontrar autors e vinhairons apassionats per son mestièr. Étienne Davodeau fa l’escomesa qu’existisson tant de biaisses de realizar un libre que n’i a de produire de vin. Constata que l’un coma l’autre an lo  poder, necite e preciós, de ressarrar los èstres umans. Es lo raconte gaujós d’aquela iniciacion crosada que vos propausa Los Ignorants.

L’autor ne coneishèva pas gran causa au monde deu vin, curiós qu’anè tribalhar dens las vinhas e dens la cava de Richard. Deu son costat, lo vinhairon que s’interessè au monde de la benda d’imatge. « Qu’aubrín numerosas botelhas e que legín hèra de libes. Que’s passejèn, a l’encontre d’autors e de vinhairons apassionats peu lor mestièr », çò explica la maison d’edicion Futuropolis. Dab « Los ignorants », Etienne Davodeau que hasó la jòga qu’existeish autant de faiçons de realizar un libe com en existeish de produsir vin. L’autor que constata que l’un e l’aute an aqueth poder d’apressar lo monde.