Aquel disc es una istòria de país, e tanplan una istòria de generacions. Las originas ne venon del sègle XIX, amb un libret que recampava qualques tèxtes de cançons de Massat (Arièja), al qual s’apondèron de cants de Jean-Marie Servat, felibre de l’endreit. D’aquelas cançons que se riscavan pèrdre, los abitants del vilatge, joves e vièlhs, practicants o pas de la lenga occitana, ne fasquèron un disc, amb l’ajuda de l’associacion occitana e del grop folcloric locals. Una experiéncia collectiva ont tot s’impliquèron bravament, e aquò se sentís !