Seleccionar una pagina

Critica musicala

0 |

COCANHA – Puput

Dançar ! Es lo primièr messatge que nos balha aqueste album. Dançar per se liberar. Liberar son còs e perqué pas son èime. Vos sufís de gaitar los clips que ne son tirats (Lo Cotelon, Suu Camin de Sent Jacques) per comprene lo vam e l’enveja de la còla. L’autre grand messatge de l’album se trapa dins lo títol : Puput, un aucèl del nom evocador, que fa lum sus las intencions feministas del grop.

Lo tresen album de Cocanha se jòga de contunh dins los escotadors del telefonet. Me suspreni de picar de las mans o de m’ensajar a un pas de dança improvisat sul camin o a l’ostal. Lo temps del confinhament venguèt lo companhon de las preciosas sortidas autorizadas.

L’identitat musicala, a l’encòp minimalista e poderosa, nasquèt de la collaboracion amb Raul Refree, musician e productor catalan que collecciona las distincions de l’autre costat dels Pirenèus. Lo grop e lo productor partejan de valors d’experimentacion e de trespassament. Lo trio occitan lo venguèt quèrre pr’amor que foguèt espantat pel seu trabalh sus l’album Los Àngeles de Rosalia. I pausèt coma productor un agach inedit sus la musica flamenco.

Ambe Refree, Cocanha se concentra sus l’essencial : la votz, lo tamborin de còrdas, lo picament de las mans e dels pès. Çò remirable aquí es lo tractament menimós dels adobaments. Se sentís una brava soscadissa sus l’emplec dels voides e dels plens, coma lo grop aima d’o dire. Per far simple diriái que Puput ten un ritme que tusta. De còps vos dona lo sentiment d’escotar de hip-hop, d’electro o quitament de soul.

Saupriái pas vos parlar de musica tradicionala, mas coneissi ben la musica pòp, e aquí n’avèm un, de disc. Solide, se sentís una mestresa granda de la tradicion orala occitana, que Lila, Carolina e Maud sabon la riquesa del patrimòni musical d’aquí, mas çò remirable tanben es que sabon ne’n tirar l’essencial per fargar una musica totalament originala. Tant coma los Ray Charles, Aretha Franklin e companhiá, que faguèron mudar lo gospel en rythm ‘n’ blues e soul.

Per Cocanha, la musica tradicionala es en perpetuala evolucion. Las cançons, per prene pas la posca, devon evoluïr segon l’interprèt e son temps. Uèi, d’unas paraulas o punts de vista de las decennias e sègles passats se pòdon pas pus ausir. Los rapòrts de seduccion e la plaça de las femnas cambièron fòrça. Lo grop trantalhèt pas de cambiar e apondre de paraulas, quitament per revirar totalament lo sens d’una cançon.

Se pòt parlar d’un biais feminista, lo grop reivindica tanben lo dreit de « s’apoderar » la musica e la tradicion, « Tornar apoderà’s lo son poder desirant » segon Carolina. S’escotatz las filhas de Cocanha parlar de lor musica, insistisson de bon grat sus aquesta nocion. Prene lo poder sus la tradicion per fargar una musica personala e actuala. Una musica d’uèi.

Per Puput se trapan tanben d’aires tradicionals sencers, e de creacions coma Lo Cotelon inspirat del libre Femmes pyrénéennes d’Isaure Gratacos. De bon notar tanben que caduna de las cantairitz prepausa aquí un tròç « solo », a la mena d’un grop de rap, alavetz.

L’album gaudís d’una coeréncia bèla e d’una identitat clara. Solide que marca una evolucion màger dins la discografia de Cocanha.

—————–
Votz & percussions
Caroline Dufau – Maud Herrera – Lila Fraysse
—————–

Patwa

Puput

Cocanha
Label Pagans
Febrièr 2020
13 €

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !