Artistas

Auteur/Autrice

Mélissande Artus

Mélissande passèt son enfança en Dordonha, ont descobriguèt l'occitan. Aprèp d'estudis a Bordèu e Tolosa, s'installa dins Avairon per i far professora, tanben animatora al Centre Cultural Occitan de Roergue e i far nàisser una drolleta. Per tal de tornar tibar lo fial amb sa grand, que mestrejava l'art textile (teissatge, tapissariá, cordura...) e que coneguèt tròp pauc, Mélissande Artús s'ofrís una formacion al prèp de Brigitte Catusse a la filatura de las Landas de Vilacomtal (12). I apren maitas tecnicas per téisser. Inspirada per la cultura occitana e francesa del seu territòri, jòga amb lo fial coma amb los mots, per de poèmas, de brodariás, de teissuts e autras installacions. Posant son inspiracion dins la natura, los elements e los senses, conta de situacions (sovent bilingüas) que la fan sorrire. En 2020, amb l'artista Joan-Carles Codèrc, crèa lo collectiu la PEL (Praxis Escrita Liura) pel Diari.
Veire sas òbras

Cloche

Originària d'Avairon, Chloé Aubert es una plasticiana e comediana. Desira far aquelas doas disciplinas complementàrias dins son trabalh. Aprèp un certificat d'estudis teatrals obtengut a París en junh de 2021, Cloche contunha de desvolopar son activitat artistica en pensant a las siás creacions (pegatges, cartas postalas, zines) coma de supòrts que se pòdon escambiar, compartir e mandar.
Veire sas òbras

Bernat Cauhapè

Artista complèt, que la paleta cobrís tan l'illustracion coma l'interpretacion teatrala (es lo fondator de la Comedia dell'oc), musicala (amb lo Savignoni Trio e lo Papet, jazz manocha occitan) o l'escritura, Bernat Cauhapè signa son òbra picturala (tencha, acrilica, pegatge, escultura) jol pseudonime de K.O.P. dins un estile "brut de brut". Autors d'illustracions per l'edicion e la premsa – publiquèt notadament de dessenhs per Aveyron magazine, Tocade, La Dépêche du Midi, IEO edicions, lo CIRDÒC – Bernat Cauhapè es tanben autors de "happenings" e intervencions en public, dins las qualas assòcia las diferentas facietas del sieu art, un mescladís de formas, de genres e de lengas.
Veire sas òbras

Joan-Carles Codèrc

Nascut a Courbevoie (92) en 1984, Joan-Carles Codèrc es originari del Segalar d'Avairon. Decidís lèu d'aviar d'estudis d'art e s'orienta aprèp lo bachilierat en classa preparatòria. Passa puèi per las Bèlas Arts de Marselha, puèi s'acara a la tipografia pendent tres ans, al dintre de l'ENSAV La Cambre a Brussèlas. Aprèp qualques annadas de grafisme, totjorn marcadas per un apròchi manual, se consacra finalament al dessenh, a la pintura o encara a la paret pintrada. E se designa d'aquí enlà, e mai largament, coma plastician. La cultura occitana fa una entrada tardièra mas indefugibla dins son apròchi, que definís aital : "crear en partissent del sòcle cultural, lingüistic e geografic occitan, aquí lo fondament de ma demarcha. Un eiretatge calat, vengut font de questionaments, de proposicions, quand se sarran de problematicas plasticas, socialas o politicas contemporanèas. M'emplegui a tornar dobrir doas vias, una per l'agach, l'autra per las aisinas. La creacion coma solucion a d'enjòcs que figura."
Veire sas òbras

Robin Chouleur

Robin Chouleur nasquèt a Nimes en 1990 d’una familha rodanenca-normanda, e creissèt dins un maset nimesenc. Es diplomat de l’École Nationale Supérieure du Paysage en 2014 puèi de licéncia LLCER Occitan a Pau Valeri en 2020. Es ara a seguir un doble cursus de Master en occitan : MEEF e LLCER. Desvolopèt una practica artistica pluridisciplinària basada sus la confrontacion entre la geometria e l'organic que se tradusís per l'emplèc obsessionau dau cairat. Aqueste es per eu l'abstraccion geometrica ideala. Permet de quadrar d'unitats concretas, de simular de fenomèns microscopics o macroscopics dau real a l'escala umana. Ansin declina la forma de mantun biais, sens limitacion de tecnicas dins d'escasenças diversas. Robin Chouleur evita leis ajudas tecnologicas per se focalizar sus una pratica engatjada fisicament, amb fòrça repeticions, desplaçaments. Es una pratica en movement que li plai de far contrastar amb l'apparéncia immudabla de sei produccions. D'efièch, es la figura regulara dau cairat que revela leis irregularitats, leis asperitats, lo caòs dau monde.
Veire sas òbras

Gérard Marty

Gérard Marty viu e trabalha a Rinhac, en Avairon, dempuèi 1984. Es autodidacte, desenhaire, pintre e grafitaire. Interven en mitan escolar, psiquiatric o carceral. Passa del negre e blanc a la color, del pichon format al bèl... Aquò fa qualques annadas que provòca d'eveniments culturals per la vila de Rinhac e la Comunautat de comunas del país rinhagués. Publiquèt fòrça obratges en çò d'edicions especializadas en benda dessenhada coma aquelas dels Requins Marteaux, L'Association... Trabalhèt per maites jornals e magazines de la premsa nacionala.
Veire sas òbras

La PEL

La Praxis Escrita Liura, o PEL, es un collectiu artistic proteïfòrme montat especialament pel Diari. Son principi es de convidar d'artistas variats, sa tòca de questionar lo rapòrt entre lenga occitana e arts visualas. De cap a un art d'expression occitana ? En tot cas dejós la PEL, lo dialògue es possible !
Veire sas òbras