Seleccionar una pagina

3QA

0 |

Vincent Roussel

Vincent Roussel

– Ostau dau País marselhés –

Vincent Roussel, lo mei marselhés deus Roergàs, que’ns presenta l’Ostau dau País Marselhés. Fondat en 2000, lo lòc de cultura occitana a Marselha qu’arcuelh concèrts, talhèrs de canta e de musica, cors de lenga, e autes eveniments tà deféner e promóver l’occitanitat d’aquera vilassa provençala. Vincent qu’ei tanben artista musician improvisator, inspirat per ua comunautat artistica locau. Marselha, vila occitana underground on tot ei possible. 

– 1 –

Presenta-nse l’Ostau dau País Marselhés, aquera associacion basada au quartièr de la Plana, adara carrèra de l’Olivièr. Quin i ès arribat ?

Ai totjorn aguda la question occitana dins un canton de ma tèsta, sensa jamai ausar cabussar. Quora una amiga me diguèt que cercavan un emplegat a l’Ostau, èra coma un present. Viure Marselha coma una vila occitana es fòrça interessant. La mission de l’OPM es de portar la cultura occitana a Marselha, de defendre un punt de vista occitanista. Aquò passa per lo Carnaval de la Plana, de cors d’occitan provençau a gratis, de balètis, de festenaus… Au moment de sa creacion en 2000, lei fondators si sentissián dins un cròs, un decalatge culturau e politic per rapòrt a sa vila e son territòri. La cultura provençala èra complètament estereotipada, coma un vestigi de la borgesiá emplit de luòcs comuns. L’associacion coneguèt d’auts e de bas. I aguèt fòrça passatge dins la còla, una dificultat a si perennizar. Mai l’Ostau capita de recampar, a l’imatge de Marselha, rufa e estacanta.

– 2 –

Qu’ès estat salariat, puish membre actiu de l’estructura. Qu’as podut entrar hens un hialat qui t’èra desconeishut, e ahortir ua consciéncia occitanista. Que’t dises adara « marselhés d’adopcion ». Perqué t’agrada tan, aquera vila foceana ?

I a una vibracion particulara, que te fai rescontrar de monde aisidament. Es una vila cargada d’istòria, de vida underground, ont tot es encara possible. En arribant, siáu estat banhat dins la creativitat dei musicians marselhés, qu’aquel Ostau ne’n sòrt. Me diguèron : « vas veire, Manu Teron (NDLR : cantaire dau Còr de la Plana, Polifonic System, Gacha Empega…) fai d’atalhièrs de cant ». E puèi as Sam Karpienia (NDLR : cantaire de Dupain, De la Crau, Gacha Empega…) que ven per beure un còp. Ai lo locau de la batariá a costat dei Massilia Sound System… L’Ostau, es per projectar aquela scèna musicala d’aicí. Es preciós d’èstre testimòni e actor d’aquela vida artistica e politica.

– 3 –

Be n’ès tanben, artista musician. Qué seré la toa dralha musicau mei estimada ? Qui son los musicaires qui t’inspiran ?

Siáu apassionat de musica improvisada. Mon instrument, es la batariá. Coma vèni dei Bèleis Arts, pensi de n’aguer un apròchi pron singular. En Roergue, siáu estat marcat e fòrça inspirat per Novèl Optic (NDLR : René Duran e Papillion, duò de cant, batariá e percussions), per lei marselhés de Dupain, ambe lo Sam Karpienia. Jògui entre autrei dins lo grope Iranhe, ambe Dawid Bouvard, Jacques Sorrentini-Zibjan e Arnaud Fromont. Nòstra musica evòca leis èrsas sus lei rocàs tan coma lei monts d’Auvèrnhe. Marselha es una vila que pren lo temps de far si rescontrar lei gents. La scèna artistica es facha d’un molon de luòcs que ressonan entre elei, de rets agradivas de percórrer.

A prepaus de l'autor

Caroline Dufau

Bearnesa expatriada a Tolosa, Carolina Dufau, dicha Carò, es una artista de terren, mai tots-terrens, de la cantèra, art que mestrèja "de com cau", fins a la vidèo al dintre del Collectiu Dètz. Carò canta dins lo grop 100% femenin Cocanha e dins d'autras formacions, e es tanben redactritz al Diari.

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !