Vaudou Game (Afro-funk – Tògo)
Peu prumèr còp laguens aqueth scopitòne version papèr, non vau pas parlar de musica occitana, pèc que’n soi !
E totun, qu’aurí podut parlar deu disc navèth de MOUSSU T E LEI JOVENTS nomat Navèga de qui ei de hèra bona tenguda, o enqüera parlar de la darrèra creacion de las gualhardas nomada Ors deus biarnés d’ARTUS … e ben nani, que serà per un aute còp, que me’n guardi drin au tistèth !
Uei, brave monde, que partim en Africa a l’encontre deu men còp de còr de l’abòr, dab lo grop deu Togò aperat VAUDOU GAME, e lo son dusau disc aperat Kidayù.
La tradicion de la musica Afro-funk que marquè pregondament la musica de las annadas 70, dab grops com EL REGO o enqüera LO POLY-RITHMO DE COTONOU, mes l’afro-funk en Togò (e tanben en çò deu son vesin lo Benin) qu’a la particularitat d’arreligar aqueth estile musicau aus rites vaudous, dab cançons en auròst a las divinitats africanas.
E qu’ei aquera mesclanha la particularitat de VAUDOU GAME, de qui s’escad entà tirar lo son afrò-funk dinc a ua tribalitat estrambordanta!
VAUDOU GAME que parla de la vita vitanta, de las valors portadas per la cultura vaudou, en tot perpausar ua musica universau e gaujosa, e tostemps en lenga Kabye, lenga parlada a capvath de Togò.
Lo grop que coneish un succès deus bèths (e plan ameritat!) dempuish quauques mes, çò de qui amuisha de plan de qui podem existar en tot cantar dab ua lenga minorisada o luenhèca.
Lhèu que caleré explicar aquò a l’auta sauma de LOUISE EKLAND, de qui’s trufè de las musicas « regionaus » l’aute dia enas ondas d’EUROPE 1… los jacobins que son atau dilhèu pr’amor n’an pas mes arren a partatjar. Non compreni pas perqué e son atau, mes que’t poish assegurar qu’aquò n’ei pas lo cas de VAUDOU GAME !
Que’t conselhi dongas lo disc navèth Kidayù, e se t’agrada, que pòdes anar escotar lo prumèr disc Apiafo de qui ei autan bon com lo dusau, dab la participacion deu soul-man togolés Roger Damawuzan .
Deu men costat, que crompèi tota la discografia en 33 torns, las baishas que soan de coma cau ! Quin plaser, magnifica !
Que sabes çò qui’t demora a hèr, diu vivant !…
