Seleccionar una pagina

Critica musicala

0 |

Un pauc de black metal dins vòstre tè ?

Diferenciar un corrent de metal d’un autre corrent de metal, aquò deu èstre un pauc coma destriar un provençal d’un lengadocian per qualqu’un que debutariá en occitan. Mas en rescontrar Pascau Sebat, ai trobat un bon pedagògue del metal. Avèm explorat sa filosofia de metalós amb l’estile musical que baileja son grop Eyes of Simurgh a l’entorn d’una tassa de tè. Li fau remarcar que la tranquillitat de l’ora del tè es luènh dels pogos dels concèrts, mas me respond qu’existís plan lo straight edge. Un d’aqueles moviments de punk hardcore que presica l’abstinéncia. Pas d’alcoòl, pas de sèxe, pas de cigarretas, de còps pas de carn tanpauc. Coma vesi qu’a vertadièrament responsa a tot, li demandi basicament :

Qué caracteriza lo metal ?

Pascau Sebat : Lo metal a començat dens las annadas 80. De hèit, qu’ei lo grop de heavy metal Venom qui sortiscoc en 1982 un album entitolat « Black Metal » qui a donat lo nom d’aqueth genre de musica. Qu’ei ua musica esnerviada e repetitiva a basa de guitarra, de bassa e de bateria damb un cant grassejant. Lo metal en generau (shens que black) que pren pro la soa plaça en occitan tanben. Entà jo, lo purmèr grop de metal de cantar en occitan qu’ei Tric Trac. Après, que cau esperar las annadas 2000/2010 entà aver ua generalizacion deu metal en occitan. Los precursors qu’estón los tipes de Stille Volk qui sortín ua caisheta de black metal en 1993 dab lo lor projècte parallèl Sus Scrofa. Puish que formèn Hantaoma e que sortín un album plan coneishut e estimat en 2005. Si voletz escotar bon metal, avetz de segur Iron Maiden, Slayer, Black Sabbath o enqüèra Boisson Divine e Lou Quinse en occitan.

Se lo motiu musical pòt èstre sovent repetitiu, la diferéncia d’un grop a l’autre se fa amb las paraulas de las cançons ?

Que poderé, mes sovent damb l’estile de cant, comprenèm pas forçadament tanpauc las paraulas. Mes perqué cercar l’especificitat d’un grop per rapòrt a un aute ? Ne cercam pas tostemps çò qu’ei l’especificitat de l’espècia umana en la soa sanceritat ! Sovent, utilizam los acòrds minors, cercam d’aver sons mau produsits entà hurnar l’estetica deu trash. Mes un grop de metal qu’a lo son univèrs qui’s ved autanplan dens las paraulas, la musica, lo vestit o lo decòr scenic.

Atal es Eyes of Simurgh ?

Òc. Lo besonh de creacion au dehens deu noste grop ei primordiau. Escrivi cançons a l’imatge de la musica qu’escoti. Eyes of Simurgh existeish despuish cinc ans. Lo Simurgh es un ausèth fabulós deu folclòr de Pèrsia qu’a vist lo monde morir tres còps. Vedètz, cercam tostemps un ligam privilegiat damb la mitologia, un univèrs imaginari eishut de la nosta imaginacion mes enrasigat dens l’imaginari collectiu, damb ua preferéncia entaus univèrs postapocaliptics.
Tots los nostes tèxtes son en occitan, qu’ei atau. Mes pensi tanben que ne cau pas aténer d’aver forçadament ua inspiracion entà escríver. L’escritura ei com un muscle qui cau entretiéner. D’un aute costat, lo hèit de non pas estar obligat de compréner las paraulas entà penetrar dens lo nòste univèrs dona ua libertat mei grana dens l’escritura. Los mens tèxtes que son en evolucion perpetuau.

Al delà del tèxte, coma transpareis lo vòstre univèrs ?

Lo visuau ei important entà nosaus. Quan escrivi, per exemple ei besonh de calligrafiar los tèxtes, quitament si ne seràn pas publicats atau. Au nivèu scenic, demoram sòbris (n’estó pas tostemps lo cas !) totun ensajam de cambiar los costumes. A còps èm vestits audaciosament, a còps simplament.

E aquera votz qui prenetz entà cantar, quin se tribalha ?

Lo growl ? Qu’ei un entrainament. Segur que cau respectar quauquas basas entà non pas petar-se la votz, s’idratar, pas tròp forçar. Aquera tecnica que pòt semblar aus cants difonics deus mongòls : Qu’ei ua nòta qui vien deu hons de la garganta, tanben, quitament si n’utilizam pas la cavitat de la boca entà la difonia. Las hemnas qui cantan dens grops de metal l’an tanben e ne’s hè pas la diferéncia entre òmis e hemnas. Mes cau plan notar que las hemnas son presentas autanlèu la debuta de l’estile.

Au moment de compausar qu’ei çò qui arriba purmèr : lo ritme o la melodia ?

Que depend, mes los purmèrs mots son los mei importants. Son eths qui van determinar e lo ritme, e la melodia. Totun, n’i a pas un mei important que l’aute. Qu’avem un trucaire deus bons e compausam tots amassa. Prenem plan lo temps de har improvizacions. N’avem pas d’organizacion, qu’em pagalhós, mes qu’avança, alavetz… Avem ua cançon qui dura uèit minutas, qu’ei lo maximum, tant vau díser qu’èm rasonables ! Mes torni díser que m’agrada tostemps de cercar. Soi un experimentau perpetuau !

Patwa

Xingara Linga

Eyes Of Simurgh
Març 2020

Los podètz veire en concèrt lo 20 de març de 2020 al Celtic Pub de Tarba.

I ausiretz de cançons d’una prigondor que liuram qualques tròces aquí :

Esclaus d’ua vila hòra deu temps estremada
Estacats balhaires de mila avarícias
Esclau Ruk, sus los cagadèrs que’t desvelhas
Au dessús de 7 mondes vius.
(Desert Wind)

Sang deus Dracs, ajuda! / Sang deus Dracs a jo!
Abraça’m de huèc viu jo e tot mon aver
Que l’enemic quand venga posca sonque passar hami
Si son vad mon empèri, que tombe e que s’ahónia
Cap-hens un ocean d’alcOOOOOOOOOl
/ e de maishantèr!
(Sang Deus Dracs)

A prepaus de l'autor

Cecila Chapduelh

"Ai res a dire ’Quilhs mots catan res N-um l-i vei la fuelha per darrier E si son ’quí, son venguts per asard Per asard de ’quelas pensadas nivolosas Sens color, sens gost, inconsistentas Inconsistentas, demoratz ! Setz de ieu, seretz de mon lengatge. Ai res a dire E ben zo vau dire."

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !