Seleccionar una pagina

Entrevista

0 |

Un laüt del país del solelh levant

Fòrça instruments qu’èran apreciats passèron de mòda, mas d’unes son de retorn, utilizats dins de musicas modèrnas. Shiho Issei es japonés, ven de Toyama. Viu a Taiwan amb son esposa taiwanesa e lor filh. Aquel jogaire professional de shamisen nos parla de son instrument.

Qu’es aquò, un shamisen ?

Shamisen significa « tres còrdas de gost ». Es un laüt a tres còrdas d’un pauc mai d’un mètre. La caissa de ressonància de fusta de santal es carrada e recobèrta d’una pèl de bèstia. Lo còl a pas de fretas. Per jogar s’utiliza un plectre, qu’èra d’evòri o de clèsca de tartuga, mas ara es de fusta. La sonoritat es pro pròcha de la d’un banjo.

Perqué avètz causit lo shamisen ?

Quand aviái 16 ans, vegèri una publicitat de Toyota amb Agatsuma Hiromitsu [jogaire fòrça famós de tsugaru-shamisen, NDLR]. Es aital qu’ai decidit d’aprene a ne jogar. Me soi mainat qu’èra utilizat per fòrça causas diferentas, la musica de salon o la cançon, mas tanben pel teatre kabuki o los espectacles de mariòtas. Per cada estil la talha e la longor del shamisen vàrian.

L’imatge d’un instrument vielhanchon persistissiá, qué ne pensavan los autres joves ?

Malgrat que siá plan present dins la cultura, i aviá aquel imatge, mas èra plan percebut per mos amics. E après aver jogat al festenal de l’escòla, èri un pauc conegut.

Avètz estudiat amb un professor ? Quant de temps vos a calgut per jogar plan ?

Òc, ai agut un professor, qu’èra plan estricte, e al començament, èra vertadièrament dificil. Al cap de dos ans mai o mens jogavi pro plan. Segur, la progression depend de quant de temps consacratz a jogar.

Qu’es lo mai dificil ? L’abséncia de freta es un obstacle ?

Se cal fòrça entrainar per memorizar las posicions dels dets fins qu’aquò venga maquinal. Apréner a escotar e jogar una melodia sens transcripcion es tanben important ; existís un sistèma de notacion mas pauc l’utilizan

Qualas son vòstras influéncias musicalas ?

Mos parents escotavan de musica classica. Escoti Uehara Hiromi e Miyabi. E lo jazz m’agrada fòrça ; retròbi tanben de variacions sus un tèma dins mon estil musical.

Perqué venir musician professional ? Es dificil ?

Fòrça joves fan de castèls dins la luna mas vertat es qu’es pas una via facila. Aguèri una oportunitat d’enregistrar un CD quand èri a l’universitat, es çò que me faguèt sautar lo pas.

Quin estil jogatz ?

Mon estil, lo « tsugaru shamisen » es originari del nòrd de l’illa principala. Es estat desvolopat per de musicians òrbs. Èra per eles una faiçon de subreviure, jogavan de vilatge en vilatge. A l’origina, lo shamisen acompanhava un cant, mas lo jogaire jogava un interludi abans aqueste. Fin finala, l’interludi es vengut mai long que lo cant, e l’a quitament eclipsat.

Ara de jogaires utilizan d’elements de la musica occidentala, pensatz que se va far al despens del jòc tradicional ?

Cresi que los corrents musicals van evoluir en parallèl. Aquò depend sustot de l’evolucion dels gostes del public.

Nos podètz contar un sovenir polit ?

Quand aviái 23 ans, Agatsuma Hiromitsu cercava qualques personas per jogar amb el sus scèna. Caliá mandar una vidèo de se en trin de jogar a una estacion de ràdio. Foguèri un dels causits. Encontrèri mon idòla, demòra un dels mai polits jorns de ma vida.

Per vos veire jogar, devèm far lo viatge ?

Non, solide ! Lo monde me pòdon veire sus Instagram !

Shiho Issei (1)
Shiho Issei (2)
Shiho Issei (3)

Shiho Issei

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Cyril VERGNAUD

Me dison Cyril Vergnaud, ma familha es sortida de Cruesa (23). Demòri en Taiwan dempuèi de nombrosas annadas, dins una vila que se ditz Pingtung e que compta mai de 200 000 estatjants. Es pas una tròp granda vila, ont fa bon viure. Soi professor de lengas e m'interèssi a las culturas, a la literatura e a l'art. Escrivi de poesia. Ai un can, que s'apèla Orange, un can d'òrb a la retirada. Malgrat que soi originari del lemosin, apreni principalament lo lengadocian, mas m'agrada d'estudiar la cultura occitana dins son ensemble.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Anóncia

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.