Seleccionar una pagina

Lume

0 |

Traversadas

Lo festenau Traversadas de Lunèu es un eveniment cinematografic dubèrt sus lo monde e lei debats sociaus. Es estat creat, trenta-uech ans fa, per l’associacion benvolenta Pescaires d’Imatges. Popular, exigent, s’adreiça ai neofites coma ai cinefiles. De mai, sa particularitat es de convidar un public jove sempre au rendètz-vos. Aquest an s’es debanat dau promier au nòu d’abriu. Esquichum d’una annada rica rica.

La programacion

La programacion d’ongan prepausa de jòias coma lo remirable Mei fraires e ieu de Yohan Manca, sostengut per la region Occitània. Nos rementa, per son estetica, que lo país nòstre es una tèrra de decòrs possibles e que lo desenvelopament d’un cinèma locau pesa dins l’economia. Retrobam a l’aficha de realizators sociaus coma Cyril Dion, estacat a l’idèa ecologica, ò Laurent Cantet qu’interròga leis identitats a l’ora dei malhums sociaus. D’autrei filmes son mai confidenciaus mai permeton, dins la sala bèla e “antica” de l’Athénée (LO cinèma de la ciutat), de conéisser d’òbras de Liban, Qatar, Canadà, Espanha, Belgica, Itàlia ò Eslovènia. Lei joves liceans retenon mai que mai lo poderós Piccolo Corpo de Laura Samani que cònta lo reviscolament, dins lo biais d’un cònte, d’un enfant mòrt.

Lei joves

Mai quaus son aquelei joves vengut tant nombrós que vos parle ? La competicion Filmes Cortets es recompensada cada annada per un prèmi dau Public e un prèmi Licean e leis escolans en opcion facultativa cinèma e en especialitat CAV (cinèma audiovisuau) de Provença e Lengadòc son leis actors màger d’aquel eveniment. Coma d’artistas en residéncia, en mai dei projeccions, practican cada jorn dins un talhier ligat au seten art : maquilhatge, rodatge, documentari, acting, rescòntres e projeccions ambe de professionaus. Se retroban totei dins lo licèu public que carga lo nom d’un grand felibre e cineasta : Loís Feuillade.

Lei sesilhas decentralizadas

Es un festenau ben pensat e que jòga son ròtle associatiu : crea un ligam fòrt entre lei populacions. Ansin, ambe lo sosten de la Comunautat dei Comunas dau País de Lunèu, de projeccions son prepausadas a gratís dins lei ciutats e vilas vesinas per donar e partejar la cultura a cadun : Saturargues, Marsilhargues, Lunèu Vièlh, Saucinas, Sant Just…

Lei convidats

An convidat Stéphane Brizé, un realizator sociau remarcat per sei filmes ambe lo grand Vincent Lindon coma La Lei dau mercat ò lo cap d’òbra En guèrra. N’aprofiecha, l’artista, per presentar un filme que clava sa trilogia sociala : Un autre monde ò l’istòria d’un quadre romput per son trabalh dins un grop industriau. Lo dimècres de matin, Stéphane donarà un cors de cinèma ais estudiants pivelats dins l’auditòri gigantàs dau licèu. Un autre convidat de marca, l’actor e realizator Samir Guesmi presenta son promier lòng metratge : Ibrahim. Enfin, nòstre còr fa tifa-tafa per Florence Miailhe, plasticiana, figura essenciala dau cinèma d’animacion que presenta La Traversada, resson a l’actualitat malurosa dei dròlles e familhas obligats de quitar lo país en temps de guèrra.

L’an que ven

L’an que ven oblidètz pas de vesitar lei Pescalunas (ansin se dison lei gents de Lunèu) per una prima en imatges. Aurem segurament l’escasença de s’i rescontrar !

close

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Matieu Poitavin

Matieu Poitavin fa lo professor d’occitan e de cinèma en Aurenja. Son escritura, inpirada tant per la literatura populara coma per la cançon cerca a mesclar tradicion e modernitat. Ambe lo fotograf Stéphane Barbier publica "Sus lei Piadas de l’Absenta" (Atelier Baie, 2016), quista d’una identitat poetica e imatjada a l’entorn de Nimes que fa l’objècte d’una mòstra que vira dins Occitània. "Un Matagòt Modèrn" (IEO, 2011), roman per lei jovents, permet una traucada dins l’escritura fantastica. "Esperit de Sau" (Aucèu Libre, 2014) (Prèmi dau Racònte, 2014, Vau d’Aran), cònta tres lescas de vida dins l’istòria d’Aigasmòrtas. En 2017, ajudat per Florian Vernet, Poitavin s’ensaja a l’escritura parodica ambe lo personatge de Josèta Kroner (Aucèu Libre) ; San Antonio n’es la referéncia comica. En 2018, l’escrivan davera lo Prèmi Ostana (Piemont – Valadas occitanas d’Italia) per l’ensems de son òbra recenta.

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Lo CalenDiari

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

Los darrièrs clips

Cargament...