Balhatz-me vòstra votz…

Aquí quicòm mai : dins aqueste jornal que se legís silenciosament (e religiosament), vaquí que cal parlar de la votz, sabi pas s’es a mièja votz o se se pòt bramar.

• Vox populi, vox Dei : cossí volètz que lo pòble multiple parle d’una sola votz e se fague l’egal d’un Dieu unenc e omnipotent. Pas la pena de cercar d’explicas o alara vos caldrà anar a la pesca de las voses !
• La votz es plan pauc de causas s’as pas res a dire, mas una votz ajustada a una votz sus de bocinòts de papafards te pòt faire un deputat o un president. De còps, cal comptar amb la votz de la majoritat silenciosa que ditz res mas pasmens pensa a çò que poiriá dire se l’òm i balhava votz al chapitre (sabi pas s’aquel mot de « chapitre » fa rire los gats francimands ?!!! S’avètz una idèa, me la diretz de viva votz quora nos crosarem).
• Avètz notat que las aucas an una votz rauca.
• M’embaucharàn pas a l’Opèra que canti coma un pairòl traucat ; de còps, coma una maça desmargada !
• Cossí aver una votz timbrada aprèp la disparicion del sagèl roge ?
• L’ipocrit a una votz faussa que sap tombar juste.
• S’avètz una votz de cabra, avètz dreit dins unas botigas a cinc cabecons o cinc pelardons pel prètz de quatre !
• Qu’es aquel rambalh ? L’Andrieu Minvielle que se passeja en canturlejant dins un pòrtavotz (sens connotacion electoralista !). Caldrà qu’un nauta-votz li digue de se calhar.
• Lo jorn ont parlarem d’una soleta votz, aquò voldrà dire que lo monde serà plan uniformizat.
• Anguèt copar d’arbres e tornèt amb la votz asclada.
• La·lo qu’a pas qu’un fial de votz arribarà pas a téisser son argumentacion.
• Qual·a se fòrça la votz, descobrís los plasers e/o los suplicis del silenci.
• Qual·a plaçarà sa votz, capitarà de cantar coma cal. Mas cal trapar un espaci segur per aquò far.
• Òm s’esclarís la votz per anonciar una situacion puslèu trebola.
• Auràn pietat de tu se lagremas entrecopan ta votz e tas paraulas.
  Ta votz interiora aurà de mal per sortir fòra de tu.
• Bernadeta Sobirós agèt l’astre d’ausir una votz divenca li parlar en lenga d’Òc.
• S’ausisses voses, te prengas pas per un sant : es ta marrida consciéncia que se rapèla a tu !
• Unas seradas, lo Patric del Brèlh a plan enveja de se petar la votz. Quicòm de pas plan aisit que met gaireben cinc minutas per arribar al silenci.
• E l’amorós ajustèt : « Entendi ta votz dins totes los bruches del monde. » (Paul Eluard)

Fin finala e per clavar, de viva votz, vos dirai qu’espèri plan que la lectura menimosa d’aquesta cronica vos age pas daissat sens votz.