Seleccionar una pagina

Umor

0 |

Germana e las Marcejadas

Qu’es aquela tissa menada amb perseverança de voler anar a tota fòrça faire una virada sus Mars (e vos parli pas d’aqueles que se vòlon metre sus lor 31 e s’i anar installar), dins un esperit batalhièr (vertat que Mars èra lo dieu latin de la guèrra, un bon A-res estimavan los Grècs !) o per lipetariá (Mars es lo nom d’una barra de chocolat, non ?).

A Mars, los Romans i avián dedicat lo primièr mes de l’an, aquel que vei lo retorn de la prima e ont los terrencs tornan soples : un plaser per i caminar e avançar a pè o a caval, sus una polida e verda pelena (levat se s’i debanèt una partida de XV amb sas mesclanhas deserbantas la dimenjada passada), amb quauques floretas (pimparèlas, primadèlas, captòrtas…) per tornar prene l’activitat maja : la guèrra. « E platz mi quan vei per lo pratz / Tendas e pabalhos fermatz. / E ai grant alegratge / Quen vei per champanha renjatz / Chavaliers e chavaus armatz » : aqueles vèrses son del trobaire Bertran de Bòrn, senhor en Peiregòrd, plan conegut vist que lo quite Francis lo cabrièr lo cita dins sa cançon Rockstars du Moyen Âge. Tant qu’a i èsser, coma l’òme es un lop per l’òme, los estatjants de la vila dels sèt sèrres estimavan que Mars èra lo paire de Remus e de Romulus que nasquèron fa plan temps, mas ja èra pas mai l’alba de l’umanitat.

Lo president de l’Elisèu ne dormiguèt pas de la nuèit : pensatz, una camèra qu’estima francesa (mas de fait concebuda dins la capitala occitana) nos manda imatges de la planeta lonhdana. E de faire lo fièr, de se montar lo babaròt, de se’n creire ! Alara qu’es una recuolada bèla : al país ont los fraires Lumière inventèron los imatges que bolegan, vaquí qu’òm es content del trabalh d’un aparelh que fotografia de calhaus ! Lo retorn enrè scientific es plan bèl !

Se pausa tanben la question de las finanças : aquela expedicion es un biais bèl d’escampar la moneda per la finèstra. Sabèm plan qu’un viatge sus Mars còsta pas de milions e de milions de sòuses (èuros, dòlars o bits del canton). E aquò tot lo monde l’a vist (o traparetz los imatges sus VòstreTudèl) e ba sap : la Germana se pagava lo viatge sus Mars, amb de bravonets òmes verds aimables coma tot, per quauques quilòs de pasta. D’unes cercaires de l’Universitat Joan Jaurés estiman que Lustucrú aviá panada l’idèa a la familha Bareil de Vilaspin (e sas vironas, crestas, dentèlas, brandilhas, cauquilhas…). Nos demorariá de verificar se los Marcians parlan francés o occitan, mas la NASA a pas botat l’estudi al programa de la mission actuala !

E nautres sabèm plan que los Marcians mandèron una expedicion en Lengadòc per çò que, s’avètz plan escotat lo son que nos an vendut coma extraordinari del vent sus la planeta celèsta, pensi plan qu’avètz reconegut qu’èra una… virada del Cèrç. Ara, demòra de saupre s’aquel enregistrament, los extraterrèstres lo faguèron a Marselheta o a Marselhan, o, qui sap, a Nòstra Dòna de Marcelha a Limós !

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Alan Roch

Alan Roch foguèt institutor pendent plan de temps, avant de venir animator cultural, çò qu'explica perque consacrèt una part de son activitat a escriure pels dròlles. E a contar, qu'Alan Roch es conegut per sas istòrias inspiradas de la tradicion e de la vida del seu país (Carcassona), que salpica d'un umor ironic. Son agach agusat li val d'escriure de cronicas dins mai d'una revista o jornal, e notadament sul rugbi, que n'es un afogat de primièra borra.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.