Dempuèi sa creacion, ÒCtele a per ambicion d’èstre lo lòc ont se pòdon veire de programas en lenga occitana. La jòga es ara ganhada. ÒCtele es una television en occitan. Lo renovèlament del Contracte d’Objectius e de Mejans amb la Region Novèla-Aquitània mòstra qu’ÒCtele es un interlocutor credible.

Tot aquò dona de programas per totas e tots e cada an de novèls son prepausats. Malgrat la pandemia avèm contunhat lo trabalh e nos sèm adaptats.

Mas se i a una causa que dona a ÒCtele tota sa legitimitat es tanben l’ajuda a la creacion amb los projèctes que sostenèm.

Las cridas a projèctes son nombrosas e ongan avèm sentit que las espèras èran importantas. Avèm recebut de projèctes en quantitat e es una bona novèla. Tanben los dossièrs que prepausan los creators son montats d’una faiçon encara mai professionala e qualitadosa, çò que respond a l’espèra dels productors mas tanben del public.

Aquò compta per far créisser l’interès que de productors mòstran de mai en mai pels projèctes en lenga occitana. Ara, produsir un filme en occitan comença de far partida de la normalitat.

Lo succès del filme de Richard Martin-Jordan Lo siular d’Aas nos dona de rasons d’èstre contents del trabalh que fasèm. Avèm participat a la naissença e a la difusion d’un documentari premiat tres còps dins de festenals internacionals.

Podèm tanben parlar de Oxford trobadors de Sébastien Hondelatte o encara de Manejaira d’aur de Patric Lavaud.

De la coproduccion en passar per la crompa o la simpla difusion d’òbras en occitan, ÒCtele jòga son ròtle per dinamizar la creacion audiovisuala occitana.

Ongan aurem multiplicat e diversificat las ofèrtas en lançant de cridas a projèctes per de documentaris, una sitcòm e tanben, en collaboracion amb TV7 Bordeaux, una crida a projècte de cortmetratge de ficcion.

Enfin, dins çò nòu, avèm l’arribada dins gaire de temps d’una crida a projècte, comuna amb los basques de Kanaldude, per un cortmetratge d’animacion.