Seleccionar una pagina

Critica musicala

0 |

Quin parlar de las musicas tradicionaus ?

La pòp occitana de Sourdure, l’electrò psiquedelica de Superparquet, lo cant polifonic e percussiu de San Salvador, lo beat-box breton deu Krismenn… e autes, que prenen plaça dens las rubricas « musica » de mèdias nacionaus francés. Parisencs, tà estar precisa. Lo famós « enter tradicion e modernitat » b’ei gahèth. L’electronic o los amplis qu’an tostemps per ròtle « d’esposcar ». A l’òra deu confinament e deus tutòs de tota traca, l’enveja n’ei pas de manca de hargar un « qu’es aquò ? » taus redactors e redactoras en perdicion. 

Companhias artisticas coma La Nòvia, Lost in traditions o Hart Brut, que tribalhan a desparetar e desenclavar las musicas d’esséncia patrimoniau. Lo 29 de heurèr de 2020, un article de tres paginas qu’ei publicat per Libération : Le retour de flammes des musiques traditionnelles.[1] Un grana respiracion ben·hasenta, taus/tà las artistas citat·da·s e tau mitan representat. Las musicas d’ancoratge tradicionau qu’an autant de valor artistica com las autas ! La reconeishença qu’ei ganhada, e que’s ved. Negue sus blanc. La portada politica qu’ei soslinhada : « le renouveau d’une scène traditionnelle longtemps méprisée » portada per joen·a·s musicaire·a·s « défendant leur langue et leur culture loin du jacobinisme parisien ». De non pas créder ! « Ua andada trad », en dusau títol. Atenetz. Qui deu jornalista o de l’artista a creat l’andada ? A l’endret on ua mar grana e s’exprimish dempuish pausa, shens aver esperat la pluma parisenca… Rai, ne guastim pas la hèsta ! Existéncia validada. Vintage planvienut. Permission d’existir. En v’arremerciar. Totun, que cau lo son e sii « modernizat » tà estar escotadís : « Sans en renier l’héritage, de jeunes musiciens ont modernisé le son, tutoyant la techno ou le rock expérimental ». Qué vòu díser « modernizar » un son ? Electrificar ? Amplificar ? Sintetizar ? Vielhotèr de las annadas 70, açò.

Las rubricas « musica » o « cultura » qu’arrecotishen tostemps suu medish camp lexicau d’un temps passat trebós. Aqueth « autes còps » que torna sortir per magia au present, e que s’amigalha dab un quasi-futur. E ns’èm ganhats un futur anterior ? Clémence Cognet – cantaira e vriulonaira deu quatuòr Aronde (enter autes) – que soslinha las nocions de temporalitat coma valor qualitativa. Dens lo bilhet d’umor « Dempuèi quora es lo futur ? » en la letra d’infò mesadèra d’Hartbrut, que questiona : « dempuèi quora se qualifica la musica de futurista per ne’n dire de ben ? E perqué ? »

 [1]    Delhaye, Eric. (28-02-2020). Le retour de flamme des musiques traditionnelles.
Sus next.liberation.fr

Au label Pagans, dab ahida e arsec, que tribalham dab ua encargada de premsa. Qu’enviam los nostes discs aus mèdias, que hèm tot tà que’n parlin ! Mes adara, pro. Hartèra de léger açò : « ritournelles ancestrales dépoussiérées », « sabots fluos et mascaras au chanvre », « on est en droit de se demander pourquoi ressortir ces vieux machins du placard. Mais parce que c’est marrant les amis ». O açò : « parce qu’il en faut [du caractère] pour puiser dans le répertoire occitan traditionnel, assumer l’image de fanfreluches ridicules des danses anciennes ».[1] Non. Non mercés, Froggy Delight.

Tau disc eponime d’Aronde, la revista Gonzaï qu’a publicat La subtile pop mediévale d’Aronde, regaudit d’ideas totas hèitas sus l’Edat Mejana. « L’andada trad » qu’ei descriuta com « un guide touristique de la France d’en bas, celle qui, localement, reprend des instruments tombés dans l’oubli (la vielle à roue, la guimbarde) pour les ramener à la vie après un bon massage cardiaque. » Nanni. Que s’ageish d’ua manca de cultura e de curiosèr musicau. Arren a véder dab la resurreccion. La lenga que’n pren drin au passatge : « un formidable exercice de transe cacophonique en vieux français », e de seguir dab « gardons ce petit secret hexagonal pour nous, et jouons le fort dans les prochaines fêtes communales. »[2] Lo provinciau, lo rurau e lo passat que’s passejan tots tres, man e man. Evident.

La Clémence que contunha lo son bilhet de « maishanta » umor « motivat per un constat amar : ma musica serà jamai delh futur. Es acostica. Profeitarai donc jamai d’un article brelingós per me lançar a l’avantgarda delhs pès-terrós. Per çò que s’agís d’aquò. Quand òm ama una musica que baneira embe la tradicion, quò’s qu’i deguèrem júnher ren de mens que lo futur per que siá sortida delhs trasfons reaccionaris e petainistas dins lo qual nòstre imaginari la manten. Nos fasèm pas ‘finar. Aquela bavassada resulta mas d’una manca de vocabulari. Lo futur servís mas que per netejar la fanja imaginària sus nòstras bòtas, l’odor de rance dins nòstras lengas, lo mosit sus nòstres instruments. »

Siim optimistas. Chic a chic, que s’i vam escàder a tornar embohar valor a las nostas lengas e culturas. Que s’i parlarà deu son, de l’emocion, de l’escritura, de la vibracion. Que s’escad dejà, en fòrt d’articles. Taus rebecós e rebecosas, aqueths temps de pandemia que mercan bahida los darrèrs moments de la societat mondializada deu capitau. Lo black out pressentit preus collapsològs que’ns deisharà shens electricitat ni petròli. Lavetz, quin soarà la musica deu futur ? E i aurà musica, au mensh ?

[1]  Bachelerie, Nathalie. (02-2020). Cocanha.
Sus froggydelight.com

[2]  Bester. (01-10-2017). La subtile pop médiévale d’Aronde.
Sus gonzai.com

A prepaus de l'autor

Caroline Dufau

Bearnesa expatriada a Tolosa, Carolina Dufau, dicha Carò, es una artista de terren, mai tots-terrens, de la cantèra, art que mestrèja "de com cau", fins a la vidèo al dintre del Collectiu Dètz. Carò canta dins lo grop 100% femenin Cocanha e dins d'autras formacions, e es tanben redactritz al Diari.

Laissar un comentari

Mercés de vos connectar per comentar
  Soscriure  
M'assabentar quand

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !