Quan un robòt escriu ua pèça de teatre

Passatz camin, la causa qu’ei entenuda. Sonque un uman que pòt escríver ua pèça de teatre. Imaginatz, que cau mesclar creacion e saber-hèr !

Que’m diratz, en 2016, un roman coescriut per ua IA (Intelligéncia Artificiau) e cercaires japonés qu’estoc finalista d’un gran prèmi literari deu Japon. Que’m diratz 1 the road, considerat coma lo prumèr libe escriut per ua IA, qu’avoc lo Doc Lab Award en 2018. De bèras curiositats de segur.
E qué pensar d’aquesta istòria ? En 2021, le chèc Tomáš Studeník que voloc deishar ua IA escríver ua pèça de teatre tà celebrar lo centenari de Karel Čapek. En efèit, en 1921, Čapek que creèc ua pèça de teatre de sciéncia ficcion, R.U.R. (Rossumovi univerzální roboti) en emplegar peu prumèr còp un mot navèth : robota (robòt), que veng de rob (esclau) en eslau ancian.

Lo lor compatriòta Rudolf Rosa que tengoc lo desfís. Que causí l’IA GPT-2, creat per OpenAI, societat fondada en 2015 per Elon Musk e sostenuda per Microsoft. La pèça que s’intitula AI: when a robot writes a play [IA : quan un robòt escriu ua pèça] e que conta l’istòria d’un robòt que part a la descobèrta de la vita e deus sentiments umans. Un extrèit qu’ei disponible sus internet.

Los cercaires que horniscón la debuta de la pèça e lo decopatge en ueit devís : mòrt, sens de l’ironia, discotèca, paur a l’escuranha, robòt tuaire, burn out, recèrca d’emplec, còp d’amor. L’IA qu’escrivoc lo contengut. Qu’estoc jogada lo 26 de heurèr au teatra Švanda, a Praga.

Com apren GPT-2 ? Per Deep Lear-ning (aprendissatge pregond). L’IA qu’a hialats de neurònas artificiaus.
Cada neuròna qu’ei ua calculadera qui hè ua operacion matematica. E cada neuròna d’ua arrengada qu’ei ligada dab totas las neurònas de l’arrengada d’avant e de la d’après. Atau, cada dada d’entrada qu’ei analisada a cada arrengada per mes en mes de neurònas. Tot prumèr, aqueste metòde qu’estoc abandonat pr’amor los calculs que venguèvan viste demenciaus ; que caloc l’engenh deu francés Yann Le Cun tà simplificar los algoritmes. Que receboc lo prèmi Turing en 2019.

Dens la nosta istòria, GPT-2 qu’avèva dejà analisat solet, sense ajuda umana (que parlan d’aprendissatge non supervisat), 8 milions de documents. Per exemple, que calcula las probabilitats d’ocurréncia de seguidas de mots ; atau que sap los assemblatges de mots que’s tròban mes sovent en un contèxte dat. Que sap abracar un tèxte, respóner a questions sus l’estructura o lo contengut d’un tèxte… En mes, l’equipa chèca que’u balhèc escripts a analisar.

Per cada devís de la pèça chèca, l’IA que creèc los tèxtes. Totun, los umans que devón intervénguer tà corregir las incoeréncias. Fin finala, 90% de la pèça qu’ei de l’IA. Se lo tèxte n’ei pas au nivèu d’un escrivan, çò qu’estona sustot, qu’ei la quantitat de sèxe e de violéncia. En fèit, tà conéisher lo parlar usuau deus umans, GPT-2 qu’a aprés en legir los escambis sus un hialat sociau, Reddit…

GPT-2 qu’a causit ua happy end. Adara, lo son hrair, GPT-3 qu’ei enqüèra mes hòrt. Que genera articles de premsa de qualitat, devisa, recomanda films o libes, tradusish tèxtes usuaus en tèxtes juridics o còdis informatics, etc.