Òc vertadierament pertot !
Dins lo mitan occitanista, sem acostumat·da·s a l’eslogan “òc pertot !”, mas pensam vertadierament a pertot ? L’eslogan “òc pertot !” es fòrça utilizat per revendicar ‘na preséncia globala de l’occitan, per charrieras, emb la senhaletica per exemple, o dins los mèdias. La tòca darrier questa preséncia es l’aumentacion de la visibilitat de l’occitan, e donc tanben sa normalizacion dins l’espaci public. E quò passa per son emplec. ‘Laidonc, es aisat de se dire que nos fau far auvir l’occitan, e donc de lo parlar defòra, en public, coma nòstre·a·s amic·ja·s !
Bon d’acòrd, mas qué quò es lo rapòrt emb lo numeric ? Subretot que çò que se passa defòra, per aura, nos en fotem, que sem embarrat·da·s ! Es tot simple ! Sufís de transpausar la situacion qu’avem vista aus malhums sociaus, que representan lo defòra dau dedins. Sus los malhums sociaus, nòstra paraula es expausada a un public, que pòt èsser tan limitat coma large. Avem quí l’enchaison de contunhar çò que comencet defòra. Empleiar l’occitan sus Twitter, per exemple, mena l’oportunitat de li balhar de la plaça segon nòstra volontat. Degun ni mai ren, sinon lo temps, nos empaicha de far un miliard de tweets en occitan.
En mai d’aquò, l’occitan a un imatge rurau, e dau passat. Lo numeric, e mai especificament internet, quò es lo contrari. ‘Laidonc l’emplec de l’occitan sus los malhums sociaus permet de li far retrobar sa jounessa, mai que mai necessària peu periòde que traversam, en lo liar emb lo numeric !
Per aura, sem luenh d’aver atenguda ‘na normalizacion o ‘na costuma. Reprocham sovent lo fach de saber l’occitan sens lo parlar quand nos trobam davant quauqu’un que coneis tanben la lenga. Mas la problematica es la mesma sus internet : sem plan nombrós a pas empleiar l’occitan mentre que podriam (òc, quitament ieu…). Si prenem l’exemple de Twitter, i a quauques comptes que se botan vertadierament dins ‘na dralha de normalizacion de l’occitan, en parlar de tot – un usatge normau per ‘na lenga fin finau – coma per exemple @SenestraLo, qu’en mai d’aquò profecha d’una bela visibilitat emb mai de 1 400 followers. Mas, un còp de mai, sem un fum a utilizar lo francés pusleu que l’occitan per costuma. Es important d’au mens i soschar, que la chausida d’una lenga pusleu qu’una autra es sovent plan significatiu (e politic !).
Pasmens, de mai en mai de monde, individualament o sus daus gropes, son a se botar a crear daus memes en occitan. Lo meme es un fenomène fòrça popular e espandit, subretot chas los jòunes, sus internet. Pòden prendre tot plen de formas diferentas (imatge, video, GIF, texte…), son generalament umoristics, e pòden quitament aver lo ròtle de reaction pic, es a dire un imatge que permet de reagir a un messatge o ‘na situacion. Sus Facebook o enquera Instagram, se tròban de mai en mai de paginas consacradas aus memes en occitan, e son de mai en mai seguidas. Fin finau, semblariá que la normalizacion de l’occitan sus internat siá plan lançada !
Alòrs, Gardarem lo tweet ?
Quauquas paginas de memes en occitan :
