« Lo país vos parla » es lo nom de la cronica occitana publiada dins l’edicion corresiana de La Montagne dempuei 2018. Quela cronica a mai d’una particularitat, desjà es facha per daus talhiers de lenga e donc frucha d’autors confirmats o començaires, coma daus liceans e collegians. E puei parlan de tot : de la vita de uei o de quela de ier, d’aquí e d’alai, de quò e de quò mai… Joan Peire Lacomba e Silveta Martin an achampat dins un obratge bravament illustrat las 150 prumieras cronicas publiadas, emb quauques textes inedichs.