Tot comencèt coma un jòc. Jean, lo pintre, escriguèt per sos amics un conte estranh e fabulós qu’illustrèt amb de tròces de sos tablèus tanplan fabuloses e estranhs. I contava coma los abitants d’un país gris e trist avián descobèrt un mond en colors e inventat lo rire. Las edicions Cocanha prepausèron de ne far un libre, per balhar als que coneisson pas encara l’òbra de Jean Hazera l’escasença de la descobrir. Demest los primièrs legidors, d’unes estimèron qu’aquel obratge s’adreçava als mainatges. Òc, mas a totes los mainatges, fins a mai de quatre vints ans.