Gérard Zuchetto perseguís son menimós trabalh de recerca, recuperacion e reinterpretacion del repertòri trobadoresc amb sa “Tròba”, e totjorn en companhiá del Troubadours Art Ensemble. Mai que jamai sus aqueste tòme recent lo trabalh foguèt malaisit, que l’autor e artista s’acarava a de tèxtes variats, azardoses quitament, escampilhats sus de brigalhs de pergamin o recopiats a l’infinit. Testimoniatges de “sense noms” que benlèu èran pas de trobadors confirmats, representan una autra vision de la cançon medievala occitana ; los tornar cantar uèi permet de ne tastar l’interès artistic.