Seleccionar una pagina

Novèlas

0 |

Festen’òc 2019

Coma cada annada en Arièja eth hestau Festen’òc que se’n torna a Saurat. Enguan, deu 12 au 14 de julh, Saurat que perpausarà ua programacion rica e eclectica : Musica tradicionau o modèrna, teatre e conferéncias, estagi de lenga e de dança,etc. Tà ne saber mes sus aquera edicion, qu’encontram a Hervé Pouvillon, figura de l’occitanisme Tolosan e benevòle encargat de la comunicacion deu hestau.

Hervé, e’ns pòdes presentar drin l’istòria e la filosofia deu hestau Festen’òc ?

Aqueste festenal se nasquèc a Saurat en 2002. Prumièr per organizar un fòc de Sent Joan d’estiu ont la lenga e la cultura occitanas siriàn valorizadas. Pèi, pauc a pauc, gràcias al vam dels benevòls e a la nhaca d’una persona coma le Joan-Luc Rozol, le festenal s’es agalhardit dinc a préner le format actual. Un format que permet de perpausar eveniments a Saurat long de l’annada (estagis, bals, etc…), e ont les quatre jorns de julhet ne son le moment fòrt. Cal pesar ací l’importància del benevolat, perque donat la feblesa dels mejans financièrs, son las gents de l’associacion, del vilatge e d’endacòm mès que fan la fòrça de Festenòc.

Per çò qu’es de la filosofia, tre la debuta fasquèguem referéncia a las valors trobadorencas de “convivéncia e paratge”. Atal le festenal se vòl un temps festiu. Eveniments que devon favorizar les escambis, les rescontres entre occitans de totis parçans e entre les occitans e las autras culturas.

L’integracion deu hestau laguens deu sué territòri qu’ei plan interessanta, qu’observam ua vertadèra capacitat tà hèr arribar eth gran public e tà tribalhar dab associacions.

Per començar, Festen’òc es enrasigat dins sa valada de Saurat, n’es sa fòrça d’alhur. Evita prumièr d’esparricar fòrças militantas limitadas e permet sustot a las gents d’ací de s’apropriar le projècte e sos diferents eveniments long de l’annada. Les sostens locals de Festen’òc son l’IEO departamental e sos diferents cercles, pèi al nivèl financièr, la Region Occitania, le Departament d’Arièja e la Comuna, çò que permés en ajustant tanbens las begudas, de pagar las despensas pels gropes.

Que constatam ua grana eterogeneïtat laguens de la programacion musicau. Quin s’ei bastida e a l’entorn de quins artistas ?

Coma cada an, la programacion afirma sa volontat de promòure le ligam ambe las valadas occitanas d’Itàlia, ongan ac festejarem ambe “Lou Quinse” e ” Lou Tapage”. Mès a l’encòp es una ocasion d’amassar artistas resconeguts coma Goulamas’k, Camille Simeray, Eric Fraj e Guilhem Lopez e de la nava scèna occitana coma “Man encantada” o “Confluéncia”.

Per fèr simple, la volontat es de crear eveniments festius e a l’encòp, le festenal es un supòrt de socializacion de la cultura e de la lenga occitanas. Ne cal pas dobtar, aurem encara ongan estagis de lenga, editors, teatre e passejadas contadas, ensajam de variar les plasers !

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Hervé Pouvillon

Formator en lenga occitana, Hervé la liga al territòri, a la natura e sa descobèrta, notadament dins Arièja, qu'i viu. Es un afogat de football e de rugby.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.