« Global mèdia », « Trans mèdia », « Cross mèdia », son d’apelacions que pòdon far paur ; çaquelà son del lengatge comun emplegat pels professionals de l’audiovisual de uèi.

Aviadas per de grops de mèdias, fa ja qualques annadas, aquelas plataformas del web assòcian de contenguts multimèdias divèrses e proteïfòrmes (tèxtes, podcasts, archius, infografias, motion-design, contenguts vidèo, bibliografias, lexics, musicas, mòstras virtualas…) a l’entorn de tèmas precises.

Los contenguts, que son mai que tot portats conjuntament per de mèdias partenaris, se tòrnan editorializar per que s’adapten a la linha editoriala causida.

Fa qualques annadas, amb l’ajuda de la Region Novèla Aquitània (TIC), OC-PROD desenvolopèt lo global mèdia Ocfutura qu’es la primièra plataforma d’aquela mena en lenga occitana.

Enriquesida cada trimèstre per un tèma novèl, la plataforma OCfutura prepausa en linha un detzenat de dorsièrs complets : « los occitans e la Granda Guèrra », « Torisme dins los païses d’Òc », « Economia del litoral », « Femnas occitanas »…

Lo Congrès, lo CIRDÒC Institut Occitan de Cultura, Lo Jornalet, lo Collègi Calandreta de Gasconha, Paraulas en Òc, de ràdios tanben, provesisson regularament de contenguts.

Lo darrièr dorsièr de ÒCfutura, sul tèma del vin es encara de bon descubrir. Aquò en esperant lo seguent que serà un numèro especial pertocant las «pandèmias en país d’Òc », elaborat gràcias a de contributors divèrses.