Seleccionar una pagina

Critica musicala

0 |

Nux Vomica – Lo disque nòu : Manda !

Lo 16 de març, Nux Vomica sortís un disque nòu : per aqueu Diari especiau Carnavàs podiá pas mielhs tombar ! Se i a ben un grope de musica actuala, en lenga d’òc, qu’es ligat a la cultura viva, populara e carnavalesca, es aqueu collectiu niçard inclassable. Tot començèt i a trenta ans d’aquò, amb una còla de pintres-musicians-agitators que se recampèron a l’entorn d’un Carnavàs independent, au barri de Sant Ròc. Puèi, pauc a cha pauc, de disque en disque e de scèna en festin e sound system, Nux Vomica installèt son estile, son biais, sa charradissa mediterranèa e son groove inchalhent, a la brasiliana.

Dempuèi 2005 e Nissa-Pernambuco esperaviam la seguida d’aquela aventura ; entre temps lo cantaire Louis Pastorelli (que rescontreriam dins lo darrier numerò dau Diari) sortiguèt un polit album dessota l’escais-nom de Gigi de Nissa, en 2010. Quant de temps passat dempuèi lo delirant e sarcastic EP Libera Jacquou ! que se trufava ambé delectacion de la deriva politica niçarda de Jacques Médecin, en 1995 ! Retrobam aquela vena impertinenta e franca dins lei tretze títols de Manda !. L’album tira lo retrach actuau e sensa concession de la capitala de la Còsta d’Azur… I a l’amor de la vila e lo raca-còr que monta davant l’embetumada, la toristalha e lo regne dau vuege, mai i a jamai de renonciament, au contrari : Nux Vomica es mai que mai dins l’estrambòrd e manda lo rampèu, sus de bassas sautejantas, de beats eficaces e dins un niçard que sona naut e fòrt. Quand passan au francés, es per transmetre un messatge clar e descriure la realitat crudèla de nòstre monde vodat au Dieu de l’argent, sus una melodia inspirada de la tradicion « repentista » dau Brasiu que ne faguèron son pròpre folclòr, dempuèi sempre. Lo tròç « Moins d’argent » es d’una precision rara : tèxte, ritmica e ritornèla fan pas qu’un, impausan son bati-bati que vos seguirà, puèi, coma una cançon qu’auriatz totjorn coneissuda…

Lo morsèu « Mai N’la » desplèga eu una trànsia verbala que, sostenguda per una guitarra e una ritmica ipnoticas, dona enveja de dintrar dins lo juec e de pausar un coblet sieu. Coma de costuma, lei pichòts « samples » participan d’un ambient generau vivent e calorós : lo disque es un viatge, una immersion vertadièra dins lo « pantais niçard » que de Gag, Pelhon, Maurís fins a Sauvaigo e tant d’autres, a totjorn marcat l’imaginari occitan. Amb « Oie Marie » retrobam l’influéncia dei vesins italians qu’an sa part dins la cultura d’una vila entre dos país. Montanha dins la mar, Niça se noirís tanben dau monde dei valadas que tiran vèrs Mercantor, Nux Vomica a sachut faire la sintèsi de toteis aquelei sòrgas diferentas que, coma l’aiga dau flume Palhon, pòu faire petar lei restancas. D’aqueu biais, capitèron d’integrar lo siblet de la musica tradicionala de la Comtea dins son raggamufin descabestrat.

            Nux Vomica pausèt sa marca naturalament, dins lo temps, amb’una musica de la vida vidanta. Nos revenon donc (mai en fach fuguèron sempre aquí, pròchis) en granda fòrma, amb una vòia e una jòia comunicativa que n’avèm tant de besonh ; Carnavàs es de retorn ! Manda la pompa !

Patwa

Nux Vomica

Nux Vomica
Manda !
Nissa Mediterranèa
15.00€

A prepaus de l'autor

Silvan Chabaud

Silvan es redactor al Diari, òc, mas carga mai de casquetas qu'aquela : jol nom de "Chab" canta dins Mauresca (Fracàs Dub) dempuèi la creacion del grop en 1999, e tanben dins Doctors de Trobar, doas formacions que fan sentir qu'es lo Massilia Sound System que lo faguèt cabussar dins l'emplec vivent de la lenga occitana. La lenga la maneja d'alhors tant que publiquèt un recuèlh de poesia, "Leis illas infinidas / Les îles infinies" (Jorn, 2012). Enfin, Silvan es universitari, autor d'una tèsi sus Bellaud de la Bellaudière, poèta provençal del sègle XVI e actualament cargat de corses a la facultat Pau Valèri de Montpelhier.

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !