Seleccionar una pagina

3QA

0 |

Mirelha Braç

Mirelha Braç

Mirelha Braç foguèt ensenhaira en collègi, es una afogada de cosina e una femna engatjada dempuèi longtemps dins l’occitanisme associatiu. Anima de talhièrs de lenga d’òc a Carcassona e de cosina a Ventenac Cabardés, es activa sus internet amb lo blòg cosina-cuisine-ventenac.over-blog.org, publiquèt en 2015 Afogassets e trufariás (Letras d’òc, colleccion Camins) que met a l’onor de recèptas per acompanhar los aperitius.

– 1 –

Mirelha Braç, cosina e lenga occitana : cossí se pòt far lo ligam entre l’art de la taula e la lenga d’òc ?

Coma i a mai d’un parlar dins nòstra lenga d’òc, i a mai d’una contrada e doncas mai d’una cosina. Unitat dins la diversitat, es totjorn estat ma linha ! La diversitat ven de las diferéncias de climat entre las regions occitanas : cosina que ten al còrs cap al nòrd, cosina mai leugièra cap al sud e l’unitat se trapa dins los delicis qu’òm se’n pòt regalar d’un costat a l’autre del país ! Coma me congosti d’escotar parlar o cantar lo monde d’Auvèrnhe, de Lemosin, d’Aquitània, de Provença o de Lengadòc !

– 2 –

Siatz nascuda a Quilhan, alara justament, coma se pòt caracterizar la cosina audenca ? E, mai largament, se pòt dire que i a un « biais » occitan de cosinar ?

A Quilhan, onèstament, manjavi pas que de farinetas, que ne partiguèri a 3 o 4 ans ! Se ditz del departament d’Aude qu’es « una França en reduccion » : la montanha, la plana, la mar… Doncas i traparetz tanplan de plats a basa de carn : adòbas de singlar, confits de volalha, tripas, tanben lo famós caçolet de Castèlnòu d’Arri e lo freginat de Sitor o tanben las anguialas en pinhata de Leucata o de Bajas sens doblidar totes los formatges de craba de las Corbièras o de feda e de vaca de la Nauta Valada d’Aude… Una cosina de la diversitat, qué ! Lo biais de cosinar audenc es lo meteis que pòdes trapar dins Occitània tota : la simplicitat, faire bon ambe pauc, l’economia, l’art d’utilizar las sòbras.

– 3 –

Se deviatz imaginar una recèpta vòstra, liura, de qué seriá e quin nom li donar ?

Aquela empega ! Amb totas las recèptas qu’existisson, encara me’n cal inventar una ? Segur, i auriá pas de peis (l’aimi pas e ai paur de las espinas !), pas de guit (levat confit), pas de conilh (qu’es tròp manhac)… Aquò es fait. Doncas, vos dirai qu’aimi fòrça los legums, los uòus e lo formatge : anam preparar una maleta ! Los legums (espargues verds, cebas doças de Sitor, favas frescas, merinjanas, pebròts, tomata) seràn cuèits cadun a despart a la padena ambe d’òli d’oliva de Bisan de Menerbés ; los uòus batuts seràn passats a la padena e i ajustarem los legums e un tròç de formatge de craba sec-sec de Cominha raspat, sal de Gruissan e piment d’Espeleta. Aquí l’afar ! Son nom ? « Lo barrejadís de la Mirelha » ! Aquò se pòt servir freg, copat a bocins, per acompanhar un aperitiu convivial !

A prepaus de l'autor

Silvan Chabaud

Silvan es redactor al Diari, òc, mas carga mai de casquetas qu'aquela : jol nom de "Chab" canta dins Mauresca (Fracàs Dub) dempuèi la creacion del grop en 1999, e tanben dins Doctors de Trobar, doas formacions que fan sentir qu'es lo Massilia Sound System que lo faguèt cabussar dins l'emplec vivent de la lenga occitana. La lenga la maneja d'alhors tant que publiquèt un recuèlh de poesia, "Leis illas infinidas / Les îles infinies" (Jorn, 2012). Enfin, Silvan es universitari, autor d'una tèsi sus Bellaud de la Bellaudière, poèta provençal del sègle XVI e actualament cargat de corses a la facultat Pau Valèri de Montpelhier.

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !