Seleccionar una pagina

Fotomatòn

0 |

Magalí Urroz – Librària occitana en Lemosin

Magalí Urroz qu’ei ua actora culturau de l’occitan en Lemosin. Ua de las de qui hèn víver la lenga en víver ena lenga que sia ena vita professionau o pendent eth sué temps de léser.

Magalí Urroz, e’t pòdes presentar en quauques mots ?

Sei salariada de l’IEO Lemosin, m’ocupe de la Librariá occitana, nòstra botica. Demòre a Limòtges, sei ’na « vilauda », mas aime la natura. Urosadament, ai mon vergier per eschapar un pauc a quela urbanitat de rason.

Quin ès arribada a l’occitan ?

L’occitan es ma prumiera linga, quand ’ribei a l’escòla, parlava pas francés. Qu’es la linga de mon enfància, qu’ai totjorn parlada dins mon vilatge emb los vesins, e que parle emb la familha dempuei totjorn. Qu’es ma linga de còr. Aüei, mon trabalh me permet de la parlar tots los jorns e quò, per me, qu’es essenciau.

Que gereishes la Librariá occitana de Limòtges. E’ns pòdes presentar drin aquera activitat de librària en occitan.

La librariá exista dempuei 1984. La difusion dau libre occitan, qu’era una mission que l’IEO, 87 a l’epòca, s’era balhat tras la debuta. N’um li tròba de la literatura occitana, en occitan o bilingüa, daus libres sus l’istòria, la cosina, la musica, los saubre-far, la toponimia… tot quò que fai la cultura occitana. Avem maitot de la musica, daus filmes e daus produchs derivats. Tot lo monde, mai sens parlar la linga, l’i pòt trobar son compte.

Dempuei mai de dietz ans, sem dins lo còr de vila de Limòtges. La librariá es duberta dau dimars au dissades. En mai, participe a daus salons coma « Legir a Limòtges », a de las festas de país.

Avem maitot un site de venda en linha que marcha pas mau (libraria-occitana.org).
Aura que sem dins un locau mai beu, perpausam de las animacions regularas.
I a maitot una mòstra tots los dos mes a la librariá. Quò a sovent ren a veire emb l’occitan, mas quò permet de far venir dau monde que sirián pas dintrats autrament, e de nos far conéisser totjorn mai.

Que practicas tanben la musica tradicionau, ne podem saber mes ?

Oc-es, fase de l’acordeon diatonic dempuei que sei pita e chante un pauc mas qu’es mai recent.
La musica, qu’es extraordinari, mercés a quò, ai fach plen de rencontres e de viatges.

Ai totjorn fach de la musica lemosina : avem un repertòri talament riche, e qu’es quò que m’interessa de far valer. Rencontrei daus musicaires au Conservatòri de Limòtges dins las annadas 90 : los chabretaires Sylvain Lacouchie e Philippe Randonneix. Nos sem pas quitats dempuei. Juegam totjorn ensemble. Fase partida dau grope Color chabreta dempuei 2003. Coma la Alexandra Lacouchie au violon, avem ’gut la chança de trabalhar coma Jan dau Melhau sus sa revirada e mesa en musica de las chançons de Gaston Couté. Darrierament, emb d’autres amics, faguerem ’n’interpretacion de sas chançons per los enfants, ’quò balhet lo disque En tut segre los jorns. Darrierament, avem format lo grope de chant « Terras » menat per la Françoisa Etay. Sem ’trapats de nos montar un repertòri.

 

Librariá occitana
42 Rua Viena Nauta 87 000 Limòtges
05 55 32 06 44 – libraria.occitana@ieo-lemosin.org

A prepaus de l'autor

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !