La còla de Tè Vé Òc ven de realizar un film per lo CIRDOC. A volgut faire descubrir la vila de Nimes d’un autre biais que lo dei guidas toristics, amb la causida de faire parlar d’escrivans nimesencs occitans. Cada quadraire /montaire causiguèt un autor e lo libre onte parla de Nimes. Son d’endrechs desconeguts que son visitats e filmats, puèi montats amb la lectura d’extrachs.

Ansin dins l’òrdre cronologic, auretz
– Antòni Bigòt, cubèrt per Claudi Queyrel e Lisa Gròs ;
– Frederic Mistral, per Miquèu Gravier ;
– Jòrgi Gròs per Lisa Gròs ;
– Jòrgi Peladan, per Amada Cròs ;
– Lisa Gròs per Marc Carteyrade ;
– Claudi Jean, per Miquèu Gravier ;
– Claudina Paul, per Lisa Gròs ;
– Matieu Poitavin, per Amada Cròs ;
– Sarà Laurenç per Lisa Gròs.

L’amira fuguèt de faire conéisser de luòcs diferents d’aquelei ja fòrça coneguts (Arenas, Torre Manha ecc.). Son d’endrechs citats per leis autors que permeton de descubrir per exemple de tròçs de garriga, d’aubres particulars dau Jardin de la Fònt, lo cementèri deis Uganauds, lo musèu dau trin, una via romana antica… Aquel film, destinat au CIRDOC, podrà èstre vist sus son site.

Aquela realizacion fuguèt un vertadièr trabalh de còla, tant dins la concepcion coma dins la causida deis autors e deis extrachs. Puèi cadun rodèt e causiguèt sei rushes per son montatge.

Lo montatge finau fuguèt assegurat per Miquèu Gravier. Vos demòra pas que de lo descubrir !