Seleccionar una pagina

3QA

0 |

Louis Pastorelli

Louis Pastorelli

Louis Pastorelli es un dei fondators e cantaire de Nux Vomica (un album nòu es en preparacion !), es tanben coneissut dessota l’escais de « Gigi de Nissa » e realizèt (ambé Manivette records) un polit disque solò en 2010. Comencèt, a la fin deis annadas 80, un trabalh grafic e plastic collectiu, au quartier Sant Ròc. A sempre mesclat pintura, musica e engatjament ciutadan, au còr de la cultura populara e liura de Niça.

– 1 –

Tot prenguèt soca a l’entorn d’un luec, la « remisa Sant Ròc », podètz tornar sus aquela aventura ?

Òc, a la debuta, aviam pegat d’afichas sauvatjas sus de veirinas de galerias d’art e dau musèu de Niça, voliam mostrar la nòstra realitat, dire qu’aviam lo drech d’existir. Mai après, rapidament, se siam dich que faudriá far quauquaren de positiu, de constructiu, au bèu mitan de nòstra vila e de nòstra vida. Ocuperiam una remisa que se vendia pas, i dintreriam e venguèt un luec d’experiéncias artisticas dubert sus lo quartier, dins lo quotidian niçard. Èra la « remisa Sant Ròc » que fuguèt lo ponch de partença d’una aventura artistica, musicala, populara e occitana, podèm dire.

– 2 –

E arribèt lo Carnaval Independent de Sant Ròc ?

Es aquò. Per evitar de se retrobar dins un monde embarrat (coma toi lu atalièrs d’art contemporanèus en generau) avèm montat lo « Carnevale Independent » dau quartier. Aqueu carnevale lo veu, ara, coma una mena d’òbra d’art participativa, collectiva. Coma aviam un luec grand, un calabèrt, podiam trabalhar e preparar aquela fèsta. Retroberiam aquí la cultura niçarda « liura », contunheriam bensai lo trabalh de SauvaigoJoan Luc Sauvaigo, cantaire, poèta, pintre niçard.[1], de l’epòca de la RatapinhataLa Ratapinhata : jornau satiric e popular niçard, fondat dins leis annadas 70, que reprenguèt lo nom d'un jornau de Niça de la debuta dau sègle XX. La ratapinhata (ratapenada) es lo simbòle d'una Niça rebèla, a l'invèrse de l'Agla.[2]… Fagueriam en tot cas referéncia a la cultura populara viva, aquela que, estranhament, se vei jamai ! Mai per aqueu carnevale, nos falia una musica : es aquí qu’es naissut Nux Vomica.

– 3 –

De la pintura a la musica, es una mema reflexion, una mema vista ?

Una soleta e mema vista. Avèm trobat una musica que parlava ai gents dau quartier, qu’amassava lei generacions e podiá acompanhar lo carnevale. Après lo grope faguèt lo sieu camin, de concèrts, de disques… Mai l’idèa èra pas de far una carrièra, musicala o artistica. Non. Subretot pas ! L’idèa èra de far existir nòstre monde e de trobar, finda, una maniera de parlar dau monde. Es una aventura que mèscla pintura, musica, teatre tanben… ambé la lenga : sempre au mitan. Dempuèi, avèm fach molon de causas, mai totjorn dins aquela vista, aquela amira : èstre ambé lei gents, dins la vida. Es lo solet biais de pas tombar dins l’art oficiau e recuperat, lo solet biais de demorar « se », sensa concession.

A prepaus de l'autor

Silvan Chabaud

Silvan es redactor al Diari, òc, mas carga mai de casquetas qu'aquela : jol nom de "Chab" canta dins Mauresca (Fracàs Dub) dempuèi la creacion del grop en 1999, e tanben dins Doctors de Trobar, doas formacions que fan sentir qu'es lo Massilia Sound System que lo faguèt cabussar dins l'emplec vivent de la lenga occitana. La lenga la maneja d'alhors tant que publiquèt un recuèlh de poesia, "Leis illas infinidas / Les îles infinies" (Jorn, 2012). Enfin, Silvan es universitari, autor d'una tèsi sus Bellaud de la Bellaudière, poèta provençal del sègle XVI e actualament cargat de corses a la facultat Pau Valèri de Montpelhier.

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !