Seleccionar una pagina

Dorsièr

0 |

L’occitan dins de l’estrangièr – ERASMUS +/ Lo CIRDÒC

De Val d’Aosta a Val d’Aran, en passant per Occitània : 6 lengas per un desvelopament durable.

S’acaba en 2018 un trabalh que s’estaloirèt sus dos ans, sostengut per la Comission Europenca via lo programa Erasmus+ : L’educacion au desvolopament durable dins nòstrei lengas. Es un projècte de dimension internacionala pilotat per lo Centre Interregional de Desvolopament de l’Occitan (CIRDÒC) que reünís sèt partenaris a travèrs quatre regions europencas (Occitània, Val d’Aran, Val d’Aosta e Piemont) onte son parladas sièis lengas : l’occitan, lo francoprovençal, lo catalan, lo francés, l’espanhòu e l’italian. L’objectiu èra de permetre a d’ensenhants e d’escolans de se rescontrar e de collaborar sus l’educacion au desvelopament durable e l’utilizacion dei tecnologias novèlas pendent dos ans (2016-2018). Amb una particularitat per menar aquesta reflexion a l’escala europenca : que que siágue lor país lei participants ais escambis aprenon e ensenhan dins un environament escolar bi/plurilingue, es a dire onte leis ensenhaments son dispensats dins doas lengas o mai.

Lo projècte s’apièja primièr sus tres seminaris transfrontalièrs a destinacion deis ensenhaires. Un seminari sus « la montanha durabla » foguèt menat en Val d’Aosta en 2016, seguit d’una formacion « Gestion d’un site toristic dins la dimension durabla » a Carcassona e d’un escambi a l’entorn dei « lengas e de lor environament » en Val d’Aran, en 2017. Lei professors que participèron son implicats dins lo programa Erasmus+ e participan a tres escambis escolars e a de projèctes collaboratius menats dins sei classas. Tres establiments son en mobilitat : lo collègi Marcel Pierrel de Maruèjols (Losera – França), l’Istituzione scolastica Valdigne Mont-Blanc – Morgex  (Val d’Aosta – Itàlia) e l’escòla Garona Vielha (Val d’Aran – Espanha).

La lenga d’òc, per sa situacion transfrontalièra e son ròtle de liame entre lei lengas romanas, es dins sa plaça bèla au còr dau programa. Per leis escolans tant coma leis ensenhaires l’accent es mes sus la pluralitat linguistica que fonde l’identitat europenca, una pluralitat qu’es au servici de la comunicacion, de l’escambi numeric e fisic. Ligada a la question dau desvelopament durable, aquela reflexion sus lei lengas dintra dins una amira globala de presa en compte de l’environament de vida (un environament mai que mai montanhòu e particularament ric en diversitat biologica per lei tres establiments concernits).

En junh de 2018, lo projècte prendrà fin en Losera amb un darrièr escambi escolar que se debanarà al collègi Marcel Pierrel de Maruèjols, au mes de mai, puèi l’eveniment final que se tendrà a Mende lo 15 de junh. I seràn presentadas lei realizacions e lei resultas d’un trabalh de dos ans que sautèt lei confinhas e mesclèt lei lengas e lei sabers. Sièis lengas coma sièis claus : la pròva es facha, un còp de mai, dei beneficis infinits dau plurilinguisme.

A prepaus de l'autor

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !