Mon volontariat : Sonia Labat

En 2015, obtenguèri lo Màster deus mestièrs de la Cultura e deu patrimòni en país d’òc a Tolosa. Coneguèri fòrça esitacions a prepaus de mon percors professionau. Decidiguèri de partir en Itàlia ont descobriguèri l’italian e la granda diversitat culturala d’aqueste país. Tornèri a Tolosa dambe la volontat de trabalhar a l’entorn de l’identitat occitana, de la sua lenga e d’ajudar a mostrar las riquesas que pòt portar una cultura viva en ligam dambe son territòri.

Qu’èi causit de m’implicar coma volontària en servici civic a la Topina pr’amor que pensi qu’avèm besonh d’aqueste tipe d’endreit ende hèr viure e utilizar la lenga au quotidian. La Topina es un cafè-restaurant culturau que promòu l’occitan. Es un luòc de rescontre, de partatge e de discutida ont se pòt tanben participar a diferents talhièrs ligats a l’occitan o assistir a d’espectacles vius. La mia mission es de montar un talhièr de cosina dambe produits locaus en occitan. Qu’organizam aqueste talhièr un còp per mes dumpèi lo mes d’octòbre. Le prumèr talhièr permetèc a un desenat de personas d’elaborar e de tastar de recèptas deu territòri a l’entorn d’una iniciacion a l’occitan e d’una descobèrta de produccions localas. Qu’èra un moment fòrça conviviau d’escambis entre occitanofòns e los que descobrissèvan la lenga, entre monde originari de diferentas parts deu territòri linguistic occitan e catalan. Adara pensam a difusar aqueste talhièr en defòra de la Topina.

A la fin d’aqueste servici civic que m’agradarèi de continuar de trabalhar au desvolopament de la Topina o autres projèctes culturaus d’aqueste tipe. Senon, m’agradarèi de trabalhar dins l’ensenhament de l’occitan.