Lo reviscòl de l’occitan al collègi Sant Martin de Tença
Pel promèir còp, ès nosautres, una opcion « sensibilisacion a la lenga e a la cultura occitanas » es prepausaa dempueis la dintraa al collègi Sant Martin de Tença (Léger Naut, Auvernha). Aquel ensenhament se fa a l’iniciativa de l’Associacion tençona La Retornada, e gràcia a l’enterès del director : lo Thierry Goudard, qu’es sensible a la question de las lingas regionalas.
« – Sem vint escolans en classa de 3ema qu’avem chausit d’aprene l’occitan per poder parlar aub nòstra familha e per que los raires siáchon fièrs de nosautres. Nos sem avisats de que conegassiam dejà franc de mots de patoès que preniam per de francès coma « lo rachós » (rapace), « un faiard » (hêtre), « es un chanin » (costaud), « lo bachàs » (abreuvoir)… »
Quò es la Véronique Degoul, salariaa per La Retornada, qu’assegura – una ora per setmana en occitan vivaroaupenc e lengadocian – aquel ensenhament facultatiu que lor adurá de punts al brevet.
« – Los objectius d’aquela sensibilizacion es de saupre que la linga exista, qu’es encara ben emploiaa açaimont, mèsme vès los joines, qu’es normal de conéisser la linga de son país. L’occitan es una linga romana badada sul monde que permet de voiatjar : d’aprene mai facilament sas lingas sòrres coma l’espanhòl, lo portugués o l’italian. Lur cultura es una richessa, es una chança per i-eles de parlar doas lingas. »
