Lo mistèri de pèira

Es un libreton que vos presenti aqueste còp. Mas tan pichon que siá, aqueste libron es ric – al mens – de tres qualitats !
Sa primièra qualitat es d’aver un rapòrt amb la tematica d’aqueste numèro del Diari. De segur èra un desfís personal de trobar e vos presentar un libre pels mainatges dins lo qual se parla de vinha o de vin. Aicí es puslèu lo fruch – lo rasim – que va téner un ròtle important dins lo debanament de l’istòria.
La segonda valor d’aqueste libret es d’èsser estat creat per d’escolans, los de la Calandreta de Ciutat a Carcassona, en 2013. Son los calandrons que metèron en scèna quatre d’entre eles, dins una enquèsta de las mai meravilhosas per las carrièras de la Ciutat emmascada per un sortilègi.
Vos daissi descobrir cossí los personatges mitics de las legendas occitanas – lo Baselic, la Romèca, lo Drac – s’intègran dins un raconte que se passa a l’ora d’ara e ont los mainatges, mercé a lors agaches desliurats de las constrentas dels adultes, viròlan dins los recantons de la Ciutat. Fantastic, modernitat e suspens s’engimban a l’entorn d’una enigma que la resolucion desliurarà, benlèu, la Ciutat e los estatjants embarrats.
Lo tresen punt que me fa plaser de metre en valor tòca las edicions IEO Aude / Farfadet que publiquèron lo libreton. L’associacion que las gerís es força engatjada per l’occitan : talhièrs de lenga, animacions, espectacles e contes pels escolans, encontres literaris, conferéncias, eca. E l’ostal d’edicion compta mai de 80 libres publicats pels adultes (Colleccion Vendémias) e 40 libres publicats pels dròlles (Colleccion Farfadet).
Daissatz-vos temptar !