Seleccionar una pagina

Reportatge Rescontre

0 |

Lo « Cafè Occitan » : un utís al servici de la socializacion de la lenga !

La socializacion dins las tassas ?

Photo d’illustracion © Rae Allen.

Lo « Cafè Occitan » : un utís al servici de la socializacion de la lenga !

A l’ora de la fusion de las regions Miègjorn-Pirenèus e Lengadòc-Rosselhon e de la batalha que se mena a l’entorn del nom d’aquela novèla region, a l’ora de l’anóncia oficiala de la creacion de l’Ofici Public per la Lenga Occitana, nos podèm demandar de quina faiçon contunhar de faire viure la nòstra lenga e cossí donar mai enveja al monde de l’aprene e de la parlar. L’ofèrta culturala occitana es mai que mai fòrta auèi e permet una difusion mai granda de la lenga dins d’esfèras diferentas de la societat. La musica, lo teatre, lo cinèma, la literatura occitana pòdon donar enveja al monde que descubrisson aquelas formas artisticas de se lançar dins l’aprendissatge de l’occitan, de lo parlar e donc de lo faire viure.
Una autra causa importanta per que l’occitan sòrta justament de las salas d’espectacles o dels corses, es la creacion de moments e de luòcs ont se pòdon retrobar los que vòlon parlar la lenga, tot en tastant un bon vin de Bordèu o del Lengadòc acompanhat, segur, de bonas vitalhas. Lo trabalh d’Emanuelle Adell, estudianta en occitan a l’Universitat de Montpelhièr que faguèt un estagi amb Philippe Vialard (Encargat de mission Lengas e Culturas Regionalas a la Region LR) nos apren qu’existisson pas mens de 9 estanquets dins aquela region. An una forma associativa e se tenon un còp per mes dins de luòcs diferents per parlar amb d’intervenents divèrses a l’entorn d’un tèma per acabar en manjant e charrant occitan dins un ambient festiu e convivial.

Un exemple de Cafè Occitan (o Estanquet)

André Denat, president de l’associacion Fasètz la lenga en Cabardés nos parla dels estanquets mensuals qu’organizan a Aragon dins Aude :

Nos podètz presentar l’associacion Fasètz la lenga en Cabardés ?

André Denat : Dempuèi un vintenat d’annadas, l’associacion lei 1901 « Fasètz la Lenga en Cabardés es presenta dins 5 vilatges del Cabardés : Aragon, Mossolens, Puègnautier, Ventenac e Vilagalhenc. Unicament gerida per de benevòls mas ajudada sus plaça per las associacions culturalas localas, l’associacion perseguís son engatjament per una politica locala, departementala, regionala e nacionala per una reconeissença de l’occitan coma lenga de cultura e lenga viva. En demai de las ajudas del Conselh Regional e del Conselh Departamental, lo supòrt logistic e financièr es fornit per las 5 comunas que los cònsols an signat una Carta Culturala que los engatjan a sosténer las accions de Fasètz la Lenga en Cabardés (qualques centims d’èuros per estajant per la part financièra). Aqueste acte politic « fòrt » fosquèt recondusit a cada eleccion.

Fasètz de seradas « Estanquet », qu’es aquò ?

Dempuèi un desenat d’annadas los Estanquets, un per mes a l’Ostal del Cabardés d’Aragon, son l’escasença de faire viure la lenga occitana. Una tematica es prepausada e de 20 a 30 participants pòdon discutir en òc (o en francés si dificultat) una orada, escambiar de punts de vista, s’entresenhar sus de « causas culturalas », e clavar per un pichon repais convivial.

Avètz un o mantuns exemples d’estanquets marcants ?

Per exemple en abril passat faguèrem un estanquet a l’entorn de la cançon occitana. De segur que de cançons sortiguèron de las memòrias, mas avèm parlat de la cançon de circonstància (fèstas, trabalh, religion…), reivindicativa (maridatge marrit, poder pesuc) e subretot, avèm agut l’astre d’aver lo cantaire Mans de Breish per escambiar sus la nòva cançon occitana dempuèi 1968.

Pel centenari de la guèrra de 14, faguèrem tanben un estanquet a l’entorn dels escriches del caporal Bartàs. Los libronets del caporal Bartàs èran coneguts (sus la guèrra de 14-18), mas es son pichon filh que nos venguèt parlar de son pepin (notadament cossí Marcel Amont faguèt la cançon) e aquò balhèt a l’encòp una vision emocionala e istorica qu’agradèt fòrça.

Un ret de « cafès occitans » de venir ?

Coma l’aliança dona sovent mai de fòrça, e que florisson d’estanquets un pauc pertot sul territòri lengadocian, una jornada de fèsta foguèt consacrada als cafès occitans pendent lo Total Festum passat (lo 3 de junh). Èra una invitacion del cafè de Pompinhan (Gard) lançada a totes los que fan d’estanquets en Lengadòc-Rosselhon a fin de téisser un ret regional dels cafès occitans e aquò, de segur, dins un ambient convivial e festiu. Aquela fèsta foguèt una vertadièra capitada que venguèron mai de 300 personas per partejar muscles e vins locals acabant la serada amb un balèti menat pel grop Garric. Aquela capitada
mòstra l’enveja que lo monde an de s’amassar per far viure d’un biais agradiu la lenga occitana. Nos podèm demandar cossí aquel ret se va desvolopar amb la fusion de las nòstras doas regions e esperar que d’iniciativas d’aquela mena se multiplicaràn tanben en Miègjorn-Pirenèus !

Las principalas activitats de FLLC son :
– la « QUINZENADA OCCITANA » (març)
– los Estanquets (1 per mes)
– los talhièrs de lenga (1 cada 15 jorns)
– la corala occitana « Cossí Que Siague »
– un viatge cultural per an per veire la cultura
occitana ont se trapa
– una fin de setmana Cinèma occitan
– qualques activitats pontualas (conferéncias,
seradas de sosten…)

Ont trobar aqueles cafès occitans ?

Aude
– Aragon amb l’associacion Fasètz La Lenga en Cabardés ;
– Narbona amb l’associacion Convergéncia Narbonesa ;

Gard
– Pompinhan
– Sent Privat dels Vièlhs amb l’associacion Lengae Cacalas
– Sent Laurenç de Gosa amb l’associacion Cercle Langue d’Oc du canton d’Aigues-Mortes
– Someire amb l’associacion Coriandre

Erau
– Clapièrs amb l’associacion O’C
– Ginhac amb l’associacion Cercle occitan Max Roqueta
– Lo Cailar amb l’associacion Larzac Village d’Europe

A prepaus de l'autor

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !