Léa Saint-Pé : ròck-star gascona deu sègle vintau
Léa Saint-Pé qu’ei ua legenda de la musica gascona ; ua rock-star vertadèra dab ua destinada excepcionau.
Mes au dia de uei, qui coneish lo sué caminament de hemna liura deu sègle vintau ? Pas gran monde fin finau e a l’òra d’un feminisme a tot pip pap, Léa Saint-Pé que poderé servir d’exemple d’emancipacion de cap tà las hemnas deu sègle navèth.
Vaduda en 1900 ena comuna de Polastron en Gèrs au còr d’ua familha de paisans, Léa qu’auré descubèrt l’acordeon diatonic a l’atge de 28 ans. Que serà tad era ua revelacion e un virolet ena soa existéncia.
Pendent annadas e annadas, Léa que partatjarà las danças gasconas dab monde deu parçan dab lo famós Rondèu de Samatan, en tot estar tròp sovent la musiciana la mes mau pagada…. e tiò, la paritat au nivèu deus picalhons n’èra pas respectada tanpauc a l’epòca. Com qué, arren non cambia.
Divorciada tota joena, que contunharà tostemps lo tribalh de la tèrra, a maugrat un succès deus bèths enas annadas 70, mercat notadament per ua virada a New-York (!) e ua participacion au miélher disc gascon au monde : Rondeaux et autres danses gasconnes à Samatan, sortit en 1977 en çò de Junquèr.
Aqueste disc qu’ei segond jo LO cap d’òbra vertadèr de la musica gascona on podem arretrobar tanben legendas de la musica tradicionau com Ernest Lurde o Perlinpinpin Fòlc, e que seré ua fauta de gost totau de la vòsta part de non pas aver aquò ena vòsta discotèca (qu’ei disponible en cd, mes que comença d’estar complicat de’u trobar en vinile… que’vs cau hurgar enas brocantas !).
Los de Samatan n’an pas desbrembat Léa : lo sué acordeon mitic qu’ei en expauscion a la maison comuna de Samatan dempuish 2012. Un acordeon gardat com ua relíquia de divinitat. Mes que tròbi que s’ameritaré mes. Totun.
Quauque còp, n’avem pas besonh d’anar luenh tà trobar las nostas idòlas, los nostes exemples. Léa Saint-Pé qu’ei segond jo lo simbèu de çò qu’auré a estar lo feminisme a la saussa gascona, dab la volentat e lo coratge enas mans.
