Preparacion

Botar lo caulet que n’auretz tiradas las primièras fuèlhas dins una ola, cobèrta d’aiga e sul fòc. Mentretant, pelar las patanas e quand l’ola bulís, la tirar del fòc. Getar l’aiga. Ajustar al caulet, las carròtas, lo garron, l’andolha e l’òs de cambajon, cobrir tot amb d’aiga, salpebrar e al fòc. Quand bulís, baissar la flamba e daissar còire a fòc suau. D’aquel temps, atalhonar la carnsalada e trocejar las patanas ja peladas. Picarem un parelh d’alhs amb lo jolverd e qualques fuèlhas de menta. Ara farem la rosòla : metrem dins un bòl la carnsalada, lo magre de pòrc, los uòus, l’alh, lo jolverd e la menta, la mica de pan trempada dins de lait, un bocin de pebre e un peçuc de sal. Barrejarem tot aquò per aver una pasta que ne farem de galetas redondas. Aquò fait, dins una padena amb un rag d’òli farem rossir la rosòla.

Al cap de doas oras, ajustarem la rosòla, las patanas e lo confit de guit a fòc suau e esperarem una mièja oreta. Alara botarem las lescas de pan dins una sopièra, i abocarem lo bolhon, salpicarem de formatge raspat e al forn a gratinar.

Servirem la sopa puèi las carns, l’andolha, la rosòla e los legums.

Variantas

A l’estiu se pòt cambiar lo caulet per de barraquets, de bledas ; s’i pòt ajustar una tomata trocejada o tanben qualques brancas d’api.