Seleccionar una pagina

Libe Joens

0 |

Lagastina

Lagastina, cantas e comptinas occitanas per tots es un libre-CD concebut per Lucia Roulet, regenta a l’escòla publica bilingüa de Begla e musiciana professionala. Un objècte polit e pedagogic qu’es pensat per un doble usatge, tan personal coma familial.

Fàcia a un manca d’aisinas pedagogicas modèrnas, agafèt lo marran per la coeta e farguèt tota una garba de contenguts pels dròlles, pels autres ensenhaires, pels parents e quitament pels ATSEM (Agent Territorial Especializat de las Escòlas Mairalas). Parteja tot aqueste trabalh sul seu blòg, que se ditz tanben Lagastina. S’i tròban de recèptas de cosina, de comptinas o de cançons. Lo blòg fa lo ligam entre l’escòla e la familha dempuèi 2017, e representava ja una aisina interessanta per far viure l’occitan. Lo libre-CD qu’es a concebre dempuèi mai d’un an es doncas l’abotiment d’aqueste trabalh, sa mesa en forma concrèta a travèrs un objècte que se pòt gardar a l’ostal e compartir en familha.

Amb aquò la regenta girondina respond a una demanda fòrta dels parents, qu’an besonh de mejans per acompanhar los dròlles dins lor percors occitan en defòra de l’escòla, e Lucia lor organiza tanben d’estagis de sensibilizacion a la lenga e a la cultura occitanas. Se lo pichon pofre violeteja uèi lo papièr, per Lucia Roulet es una etapa de mai dins sa mira d’afortir los ligams indispensables entre la classa e l’ostal, per que la transmission de la lenga se faga dins de condicions optimalas.
Lo libre es polit, los dessenhs forçadament un pauc ninòis e enfantins de l’illustratritz IsapointK fargan l’èime d’aquel libret e butaràn a virar las paginas. Las comptinas e cançons, en defòra d’un cant tradicional aquí adaptat, son totas estadas escrichas e compausadas per Lucia Roulet, qu’en mai de far regenta es tanben musiciana dins lo grop Anem Trio, e, entre autras causas, titulara d’una licéncia en musicologia. Coneis la musica ! Sos tèxtes abòrdan los tèmas que trabalha en classa, amb un vocabulari de la vida vidanta, e, a cada còp, per acompanhar las paraulas, un lexic pels pichons e un pels parents. Aital Lagastina ajuda los pichons a apréner las colors, lo vocabulari de l’òrt o de la familha, o encara a se presentar. S’i tròba tanben una dimension culturala amb per exemple La Halha de Nadau e sa formula magica, allusion a la famosa fèsta tradicionala gascona. D’escrich e d’àudio per partejar de moments « occitans » en familha, simple e eficaç.
Mas es pas tan simple qu’aquò de produsir un trabalh aital amb de mejans modèstes. En mai d’una campanha de finançament participatiu bravament capitada, Lucia Roulet posquèt comptar sus de bonas volontats a totes los nivèls de la realizacion del projècte, e notadament la participacion graciosa dels sèt musicians que liurèron de composicions estrambordantas, a l’encòp tradicionalas e modèrnas. La varietat dels instruments e la qualitat de l’orquestracion fan de Lagastina un supòrt pedagogic de tria, mas tanben un objècte cultural polit qu’a pas res a envejar a çò que se fa en francés pels meteisses publics.
Lagastina es estat editat a 600 exemplars dins una version gascona e una version lemosina, o podètz comandar en linha sul blòg o la pagina Facebook de Lagastina, o lo crompar dins tota bona librariá occitana. En mai del CD, un ligam vos permet de telecargar una version numerica mai adaptada als ordenadors e telefonets.

Lagastina

Lucia Roulet
Libre – CD, 2022
7 cançons e 6 comptinas
(Occitan)

close

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Lo CalenDiari

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

Los darrièrs clips

Cargament...