Seleccionar una pagina

Tòca-Maneta

0 |

La plaça de las lengas minoritàrias dins lo videojòc

1 – Never Alone / 2 – Eleanor d’Aquitaine / 3 – Winterfall

2012 : Assassin’s Creed III, super-produccion videoludica, sortís. Aquel 5en òpus d’una franquesa d’aventura/accion que permet de tornar visitar l’istòria m’atrai mejanament, que quita la Renaissença per la Revolucion americana, que m’interèssa plan mens. Mas crentas s’avalisson lèu, que lo jòc nos fa viure la vida de Ratonhnhaké :ton, un jove Kanien’kehá:ka, una nacion americana nativa coneguda jol nom de Mohawks (Mas aquò’s un exonime, un nom donat per lors enemics, que vòl dire “antropofag”). Dins la primièra part de l’istòria, avant de s’enfrentar a una revolucion que daissarà de costat los pòbles primièrs, l’eròi parla dins sa lenga ! Una presa de risca per una tala produccion.

Dos ans aprèp es Never Alone que m’interèssa per una rason parièra : aquel jòc, inspirat de legendas dels Iñupiats d’Alaska, se conta dins lor lenga.
Mai qu’aquò : l’aventura en plataforma, classica, es mirgalhada de vidèos, vertadièrs collectatges sus la vida e la cultura d’aquel pòble.

E en cò nòstre ? Es pas ganhat. Coma o ditz Fulup Jakez de l’Ofici Public de la Lenga Bretona, i a gaire d’ajuda publica pels videojòcs, que son pas tròp considerats coma de cultura. Lo ligam amb las lengas regionalas, que patisson del meteis sentit, es doncas malaisit de téisser. Tot repausa sus las bonas volontats, e tanben un pauc sus la sòrt.

Aguèrem un jòc en 2019, comandat per la Delegacion a la Lenga Francesa e a las Lengas de França, Romanica. Presentat amb qualques elements fantastics, es en fach un jòc un pauc limitat, dins lo qual cal atribuïr una etiqueta-mot al bon còfre-lenga (romana) : francés, romanés, portugués, còrse, catalan, occitan.
Pas fòrça plasent, lo jòc ven quitament frustrant quand un mot qu’existís dins mai d’una lenga es pas botat dins la bona mala…

E vos desconselhi Legends of Catalonia, un jòc-publicitat toristica en realitat virtuala pondut per la Generalitat e jogable en catalan ; manca se volètz saber de qué sembla l’equivalent videoludic d’un « nanar » cinematografic.

Se volètz ausir d’occitan, cal pas cercar del costat del jòc bordalés A Plague Tale : Innocence que se debana pendent la Guèrra de Cent Ans en Aquitània, n’i a pas una micalha. Val melhor lançar una partida de Civilization VI : Gathering Storm, causir d’encontrar “Eleanor of Aquitaine” e profeitar, pendent los dialògs, d’un occitan medieval que sembla de bona tenguda.

Los bretons, eles, an Steredenn, “Estèla”, que se tròba èsser… un jòc de tir espacial, pas marrit amai. Pas de dialòg, una interfàcia minimala pasmens revirada en breton, tot aquò sembla una debuta, nascuda de la volontat e de l’investiment d’un jogaire que capitèt de s’acordar amb l’estúdio de desvolopament.

D’aquel temps, Fabien Mariani, còrse de son estat, desvolopa solet dins son garatge un jòc tras qu’ambiciós : Winterfall. Malgrat son nom, lo jòc es una aventura dins un monde de fantasiá obèrt amb una narracion en lenga còrsa. E aquel d’aquí, l’espèri bravament !

Enfin, çò que se passa costat basc es plan revelator : los gamers bascs se montèron en collectiu militant per l’utilizacion de l’euskara dins los jòcs vidèo.

Autrament dich : per aquò coma pel demai, cal tot far d’esper se !

A prepaus de l'autor

Tristan Gahús

Tristan Gahús es l'escais, coma aquò se fa dins aquel mitan, de qualqu'un qu'aima plan los videojòcs e qu'es prèste a partatjar sa passion en occitan. Autor de detzenas de cronicas, de còps radiofonicas, sus las sortidas recentas, chafradas Tòca-Maneta, tòrna sul Diari amb una novèla formula, mai larga e mai "trans-mèdia", coma se ditz en occitan blos !

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !