Seleccionar una pagina

Espòrt

0 |

La Passem, 7 projèctes finançats tà har valer la lenga nosta

La Passem, 7 projèctes finançats tà har valer la lenga nosta

Au mes de mai de 2018, que’s debanà la permèra edicion de La Passem, ua corruda de 3 jorns a contunh tà deféner la lenga occitana preus territòris deu Biarn e Baish Ador. En tot basà’s suus modèlas de la Redadeg bretona, de la Korrika basca o d’autes « córrer-lenga » europeans, lo ligam – senhau pingorlat portaira d’un messatge – que s’ei passejat d’ua man a l’auta sus quauques 400 qm. Tot quilomètre qu’estó crompat e corrut. Que son 48 000 € qui son estats amassats, 43 000 € que sòrten d’estar partatjats enter mantuas estructuras seleccionadas.

Lo bilanç financèr de la permèra La Passem qu’ei adara sancèr e coneishut : lo budget amassat en tres jorns e tres nueits de corruda, enter Bidaishe e Pau, que pòt adara estar dedicat au finançament de la transmission de la lenga. Las accions causidas que son concretas, tà que la lenga e’s vedi, e’s transmeti, e’s hesqui enténer, e sustot, e hesqui ligam enter tots. Quin s’ei hèita, aquera seleccion ? La condicion permèra tà participar qu’èra de’s redigir lo projècte en occitan, en grafia normalizada utilizada per l’Educacion nacionau. « La lenga nosta n’ei pas un simbèu, qu’ei emplegada dens lo quadre deu projecte ». Atau, las causas que son claras. Pas de saupicatge toristic. Los projèctes que deven partatjar a l’espiar de tots « un imatge positiu virat cap a l’aviéner » e «  shens crear divisions ».

L’associacion Ligams e los membres deu comitat de seleccion qu’an causit de privilegiar las accions miadas preu territòri percorrut, tà que los sòus engatjats e siin valorizats sus plaça. La grasilha deus critèris b’ei exigenta : que cau l’accion e hesqui besonh, on lo projècte e hè reclam, que los impacts e’n siin positius a mantuns nivèus societaus, en tot mobilizar partenaris e desvolopar ua sinergia locau. Atau qu’i responen, los sèt causits au demiei d’un vintenat de dossièrs depausats. Que i aurà donc 24 000 € tà la Federacion Calandreta Biarn, tau pòle educatiu de Pau, qui desvoloparà las infrastructuras taus escolans e ahortirà las cordèras enti’aus colègi e licèu ; 2000 € entaus Chancaires de Sent Pèr de Lèren, tà la realizacion de panèus en banda dessenhada sus la practica e l’istòria de las chancas, qui companharà lo parc d’iniciacion a las chancas ; 2500 € tà Reclams, per la reedicion deu diccionari Simin Palay, tesaur linguistic de la lenga occitana ; 2500 € entaus Menestrèrs Gascons tà la realizacion deu libe-CD entaus petitons Lo trin de la dança ; 5000 € tà l’associacion Art’Òc qui avia la produccion de la seria audiovisuau Pelòt, lo Robin deus bòscs bigordan ; 4000 € entau CFPÒc de Navèra Aquitània, tà jornadas d’iniciacion a la lenga taus pairs de classas bilinguas e escòlas Calandreta ; 3000 € entaus Contes Sharnegos au hiu de la Bidoza, per l’association Bidaishe Cultura.

Qu’arretroberam la dusau edicion en 2020, quate jorns e tres nueits sus un territòri mei espandit enter Baish Ador, Biarn, Lanas e Bigòrra. De que sortir deu departament administratiu francés, e ahortir la nosta gasconitat ! Desirem qu’aqueras envelòpas – « utís d’amorsatge e de desvolopament » – ne remplacin pas las aidas institucionaus. Los politicians que se’n deven responsabilizar. Adara, qu’an tanben lo parat d’ac muishar en tot comprar quilomètres e córrer. Ua lenga, tà tots ! Correm, la passem !

A prepaus de l'autor

Caroline Dufau

Bearnesa expatriada a Tolosa, Carolina Dufau, dicha Carò, es una artista de terren, mai tots-terrens, de la cantèra, art que mestrèja "de com cau", fins a la vidèo al dintre del Collectiu Dètz. Carò canta dins lo grop 100% femenin Cocanha e dins d'autras formacions, e es tanben redactritz al Diari.

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !