La font supereroïca
Adieu los pitits ! Qu’es lo Capitani Lemosin que vos parla dempuei son repaire secret ‘captat au mitan dau malhum de galariàs que s’espand jos la vila de Limòtges. Vos vau parlar de mos cosins americans. Vesetz de qui parle ? Son beus, son fòrts, son coratjós, qu’es los supereròis ! Dempuei d’annadas, ‘visatz lors aventuras sus los ecrans beus o pitits. Mas sabetz segurament que son de las adaptacions de bendas dessenhadas que se ‘pelan daus comics. Avetz l’énvia de ne’n legir, mas sabetz pas per ente començar ? Adonc, vos vau aidar un pauc.
De’n prumier, fau saubre coma son escrichs quilhs comics. Aus Estats Units, qu’es daus libretons d’un vintenat de paginas, centrats sus un personatge o una equipa e que suerten a pus pres tots los mes. En saubre que Superman apareguet en 1938 e Captain America en 1940, vos laisse comptar quantben de paginas son estadas imprimidas per chascun de quilhs eròis ! Los comics son publiats principalament per doas maisons d’edicion : Marvel, la Maison de las Ideas, e DC, lor Distinguida Concurréncia. Per chascun de lors eròis, fan trabalhar un autor mai daus dessenhaires pendent 2 o 3 ans, davant de chamnhar d’equipa creativa. Entau, avem çò que ‘pelam un run, una seria d’arcs narratius, d’intrigas, que fan una istòria coerenta.
Coma chausir un run ? Segon qui es vòstra eroïna preferida, a l’azard Wonder Woman o Captain Marvel, o tanben l’estile dau dessenhaire que vos plai lo mai. E coma lo segre ? Si mestrejatz la lenga de Stan Lee, podetz trapar las darrieras surtidas directament ‘ribadas daus Estats Units en córrer chas Pulp’s a Bordeu o a la librariá Bédéciné de Tolosa, per exemple. O ‘chaptar lors versions francesas au quiòsc en fàcia dau liceu (mai benleu a costat de chas vos). Mas coma setz au mitan de l’istòria, qu’es benleu pas ‘cepte de tot compréner. Adonc vos fau rensenhar sus los runs en cors, los que van ‘ribar, e lors adaptacions en França.
Una autra solucion es de legir un run paregut en libre. Quò será pas las darrieras aventuras de vòstre superaubre favorit – nos s’apelam tots Groot – mas quò permet d’aver una istòria completa. La còsta de quilhs libres pòt èsser un fren aus prumiers ‘chaptadís (una vintenat d’euros per una BD). Los editors francés de comics americans (Panini per Marvel e Urban per DC) suerten regularament de las colleccions promocionalas a l’entorn de 5€ lo libre per far descubrir las aventuras de lors eròis principaus. E tanben, chasca annada, lo 1er dissabde dau mes de mai, es organizat de pertot dins lo monde, lo Free Comics Book Day (lo jorn daus comics gratuits) emb sa seleccion de libretons editats per l’enchaison, disponibla chas los libraris qu’i participan.
Aura sabetz tot çò que fau per ‘nar cerchar l’aventura a sa font, dins los comics, e de segre las istòrias epicas, passionantas e mai amusantas de vòstres eròis preferits ! Bona lectura !
Aqueste contengut vos es ofèrt per :
