Seleccionar una pagina

Tòca-Maneta

0 |

La conservacion del videojòc : un enjòc màger

Crèdit fòtos
1 – De supòrts a conservar © CNJV
2 – Exposicion GAME © Laurent Lecat

Chaspaires de maneta, picanhaires de botons, balhaires de jòia a stick e esportius de canapè, adissiatz !

Me sembla que lo monde son plan estacats al patrimòni. Una catedrala, una lenga o un bocin de muralha, nos sentissèm totes un pauc Malraux a pas voler que desaparesca çò que l’umanitat foguèt en capacitat de crear. E me sembla tanben qu’en tèrmes de conservacion de las òbras culturalas al sens larg, la França a un biais d’istoric e d’interès plan assolidat.

Pel videojòc, emai foguèsse un mèdia recent, las questions ligadas a la conservacion son ancianas, sens capitar d’empachar d’òbras davancièras, independentas o confidencialas de tombar malastrosament dins lo desmembrièr de l’Istòria videoludica. Cal dire que la conservacion, per un mèdia qu’apareis pas còp sec coma un ben cultural, es un afar de colleccionaires, amb doncas de mejans que dependon de la benvolença de cadun.

En França, cal esperar 1992 per que lo depaus legal prenga en compte los contenguts multimèdia. Aquò vòl dire que, tal coma pels libres, los productors franceses de videojòcs son tenguts de mandar a la Bibliotèca Nacionala de França dos exemplars de çò que produsisson, per fin de consultacion, documentacion, conservacion « etèrna », recèrca (de mai en mai frequenta). Ja, vesèm plan que sèm confrontats a dos problèmas : primièr tot çò que data d’abans 1992 es integrat sonque perque la BNF tòrna crompar de causas, mas ne manca totjorn, e segondament aquò concernís pas que las produccions o las distribucions francesas, dins una industria qu’es mondializada.

En mai d’aquò, s’un libre o un film pòt pausar qualques problèmas « tecnics » de conservacion, lo jòc vidèo es autra causa : imaginatz ben que s’agís de conservar en l’estat tant lo material de lectura/enregistrament coma las òbras, las consòlas e los jòcs, los ordenadors e los logicials. Parlam de material que vielhís lèu, de tecnologias abandonadas, de connectica pas pus utilizada. Pels jòcs, s’utiliza l’emulacion, la creacion artificiala d’un environament virtual per poder lançar un programa d’autres còps amb lo material informatic de uèi. Mas es qu’es lo meteis jòc ? La question, quasiment filosofica, se pausa.

Anem mai luènh : quid dels jòcs « a DRM » que limitan l’utilizacion, dels jòcs que demandan una connexion per èsser lançats ? E quid dels MMO, los jòcs en linha, que recampan una comunautat umana a un moment donat mas que, un còp la mòda passada, un còp lo monde partits trevar un autre jòc, veson lors servidors se barrar e lor univèrs s’escantir ? Cossí capitar de servar la memòria d’un espandi virtual ?

La question es uèi talament d’actualitat qu’un fum de cercaires son a i trabalhar dessús, se fan de collòquis, e lo public tanben s’i interèssa, ne pòdon testimoniar los musèus e las exposicions dedicats al videojòc, coma aquela que se faguèt en 2017 a la Fondacion EDF de París e que foguèt perlongada mercés a son succès.

M’arrèsti aquí, mas podriam tanben parlar de la desmaterializacion totala que s’anóncia, e que fa pèrdre per avança de pèls a plenponhs als conservators del multimèdia !

A prepaus de l'autor

Tristan Gahús

Tristan Gahús es l'escais, coma aquò se fa dins aquel mitan, de qualqu'un qu'aima plan los videojòcs e qu'es prèste a partatjar sa passion en occitan. Autor de detzenas de cronicas, de còps radiofonicas, sus las sortidas recentas, chafradas Tòca-Maneta, tòrna sul Diari amb una novèla formula, mai larga e mai "trans-mèdia", coma se ditz en occitan blós !

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !