Seleccionar una pagina

Eveniment

0 |

IEO Eveniments : Lo Carnaval Gascon

Lo Carnaval Gascon

Eth Carnaval Gascon de l’Isla de Baish que pertòca mes de 4000 personas de qui 2000 joens deus parçan (de l’escòla entiò eth licèu) qu’aprenen cants a l’escòla, puish que’s tròban tà hèr eth passacarrèra, cantar e assistir a un jutjament en occitan. Eth carnaval que s’acaba conviviaument dab un gran sopar e concèrts. Tà compréner de plan çò de qui arrepresenta un Carnaval a L’Isla de Baish, aquiu quauques testimoniatges d’aderents de l’associacion.

Le Carnaval de la Maíte

Quan veng le temps de Carnaval, pensi a las annadas 2000, on sus las plaças de la comuna, dançavam las danças tradicionalas gasconas : le rondèu deu Savés, le congò, la mazurkà, la polcà picada, le cèucle circassian, la ronda deu Querci e valsas divèrsas. Apèi, mos passejavam dins la vila, nos arrestavan davant les estanquets que nos balhavan un còp a béver. Èram un quarantenat de dançaires, vestits dambe una còpia deus vestits gascons tradicionaus masculins e feminins.  Nos aperavan les dançaires de l’Isla de Baish.

Le Carnaval de la Francesa

Quan pensi au Carnaval Gascon, en tot prumèr, me brembi la serada de Nadau en 2017. Èri plea d’emocion.
I avèva fòrça monde e totas las gents cantavan : les petits e les joens autant que les mès vièlhs. Le monde èran esmavuts, emocionats. Le cantaire de Nadau, mercés a l’armonia deus cants, de la musica, de la poesia e de l’ambiança, les biaises de se trufar de la societat, deu monde e d’eth-medish dambe precisions imatjadas, a hèit un espectacle fantastic, aquò qu’èra tarrible ! Èra la hèsta ende tot le monde, tanben èri contenta de le tornar véser en mars 2019, a l’Isla de Baish endeu Carnaval Gascon.

Le Carnaval de l’Andriu e de la Sandrina

Le Carnaval Gascon nos hè soscar a la hèsta de las escòlas. I a totas las escòlas que caminan dins las carrèras.
I a passa-carrèras dambe gropes de musica tradicionala e danças endeus 2000 dròlles de la vila.
Es un gran plaser ende las 4000 personas – pairs, mairs, gran-pairs e gran-mairs – qu’accompanhan les mainatges. Véser la populacion vénguer atau es fantastic, especialament, véser les liceans venguer dansar e cantar en fin d’apèi-dinnada es la marca de la realitat de la nòsta cultura e de son expression.

Le Carnaval de L’Olivèr

Ende jo, le Carnaval Gascon comencèc vint ans en darrèr… avèvi tot just vint ans. Qu’èri le mès joen de la banda e pr’aquò le mès assabentat en musica tradicionala e en occitan. N’èi vistes tipes bandats e hemnas decidadas ! Èi vist tanben dròlles a s’amusar, a cantar e a dansar. Èi vist l’associacion a cambiar e a evoluir… a la debuta l’essenciau de la hèsta èra le dissabte maitin e le dissabte apèi-dinnar… après i avoc le cors de danças dambe P. Lasèrra e après la Paulèta, i avoc tanben les corses d’Occitan dambe  V. Rivièra, i avoc les diferents presidents : le Felip, la Sandrina, l’Ives e ara jo. Ara, au Carnaval Gascon,  i a una serada cada mes, i a talhèrs d’occitan, de boha, d’acordeon, de pifre, de tambor, de canta polifonica… me tarda de véser l’avénguer !

A prepaus de l'autor

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !